Familjarë, të afërm dhe banorë të së gjithë zonës së Frashërit, në Patos, i kanë dhënë lamtumirën Anesti Ramës, kryefamiljarit që iu mor jeta në mënyrë makabre nga bija e tij, 26 vjeçe.
I vetmi pjesëtar i familjes së tij, që kishte ngritur me aq mund, që ishte në atë ceremoni lamtumire, qe vetëm Krisjola, 28 vjeçe, vajza e madhe e të ndjerit, e cila ishte mashtruar ashtu siç edhe policia për shkakun e vdekjes së Anestit. Motra e saj i kishte telefonuar për ta njoftuar se babai ishte rrëzuar në tualet dhe kishte ndërruar jetë.
Përveç fakteve tronditëse të mënyrës se si ia morën jetën, vajzë dhe nënë bashkë, Anestit, ngjarja bëhet edhe më shokuese teksa mësohet se i madh e i vogël në Frashër dëshmojnë se janë në dijeni të dhunimit dhe poshtërimit sistematik që i bëhej të ndjerit nga gruaja dhe vajza e tij.
Dje, policia e Fierit bëri me dije se është vënë në pranga edhe bashkëshortja e viktimës, Valbona, 53 vjeçe, e cila aktualisht është vetëm nën akuzën e fshehjes së krimit, ndërkohë që ende nuk është bërë publik rezultati i autopsisë në lidhje me mënyrën se si u vra 56- vjeçari, në një orë të pabesueshme për të rënë pre e sulmit të së bijës, pasi deri me tani pretendohet se e bija ka vepruar e vetme në atë akt horror.
Prokuroria e Fierit ka ngritur një grup ekspertësh për të hetuar çdo fakt që del nga dëshmitë e banorëve të zonës, ndërkohë që prokuroria nuk bën me dije nëse ka nisur hetime edhe në lidhje me denoncimet e shumta që janë bërë për ushtrim dhune ndaj të ndjerit nga dy femrat e jetës së tij.
Banorët e fshatit dëshmojnë fakte drithëruese të mënyrës se si është trajtuar Anesti, ndërkohë që ka dyshime që krimi të jetë i paramenduar, por do të jetë prokuroria që do të hedhë dritë mbi një mori të fshehtash që mbart ai akt mizor që ndodhi në familjen Rama.
RRËFIMET MBI DHUNËN
Dhunimin sistematik që nënë e bijë ushtronin ndaj 56- vjeçarit Anesti Rama në Fier nuk e dinin vetëm banorët e zonës, por edhe autoritetet. Prej kohësh ato ishin në dijeni e madje policia kishte shkuar disa herë në familjen Rama, por dhuna nuk u ndal derisa e bija i mori jetën të atit. Ende nuk dihet se çfarë masash ka marrë policia në lidhje me këto denoncime, por ajo që mësohet nga rrëfimet e banorëve është shokuese. Kryeplaku i fshatit Frashër, Irakli Zarka, tregon i tronditur se si e mësoi ngjarjen e rëndë të krimit në familje, ku fillimisht i kishin thënë se Anesti Rama kishte pësuar infarkt dhe kishte ndërruar jetë.
Ai tregon se Anesti Rama, ka jetuar gjithmonë në kushte tepër të vështira ekonomike, duke filluar si bari i një tufe me dhi, si punëtor krahu për disa vite në Greqi e për të përfunduar si punonjës i një ferme blegtorale në zonë.
“Ka qenë djalë i urtë, punëtor, ishte disa kohë në Greqi, punoi andej, bëri shtëpitë, pastaj pati ca dhi, merrej me dhitë. Këto nuk e trajtonin mirë, vinte më ankohej nuk më trajtojnë mirë, edhe për të ngrënë nuk i jepnin. I thoshin ik nga shtëpia, është shtëpia jonë. Ka shkuar disa herë edhe policia, edhe unë. Ishin të pabindura. E trajtonin shumë keq, ai ishte punëtor. E di sa keq na ka ardhur si fshat. Gjynah t’i visheshin thoshte në grykë atij njeriu, çfarë të flasësh për atë”, – tregon ai.
Anesti Ramën e përshkruan si një njeri të qetë, punëtor. Nuk kishte jetë sociale tregon kryeplaku Zarka, dinte vetëm punë dhe shtëpi, ku trajtohej shumë keq nga bashkëshortja Valbona dhe e bija Emalinda.
“E linin pa ngrënë dhe donin ta hiqnin nga shtëpia”, thotë ai teksa tregon se familja Rama trajtohej dhe me ndihme ekonomike 3 mijë lekë në muaj. Vetë kryeplaku i kishte ofruar nënë e bijë që të punonin në një këpucari, por nuk pranuan.
“Donin jetë të mirë, por shikonin telenovela gjithë ditën”, shprehet ai. Zarka pohon gjithashtu se pavarësisht se ai keqtrajtohej vazhdimisht, nuk është i habitur për mënyrën se si ia morën jetën, pasi nga ato të dyja gjithçka pritej thotë ai.
“Ajo shkollën 8- vjeçare ka mbaruar. U martua njëherë, pastaj u ndajnë. Rrinte me të ëmën. Punonin nëpër serë bashkë me nënën. E trajtonin keq, nuk e di ca kishim me atë të uruar”, – theksoi Zarka.