Një tërmet me magnitudë 6.1 ballë goditi të dielën provincën perëndimore të Balikesirit, duke shkaktuar vdekjen e një burri 81-vjeçar dhe plagosjen e 29 personave të tjerë.
Viktima, Nihat Onbas, ndërroi jetë në spital pasi u nxor nga rrënojat e një ndërtese trekatëshe që u shemb. Bashkëshortja e tij, Hamide Onbas, mbijetoi me një frakturë në krah.
Ministri i Brendshëm i Turqisë, Ali Yerlikaya, konfirmoi se asnjë nga 29 të plagosurit nuk është në gjendje të rëndë. Ndërkohë, sipas të dhënave të Ministrisë së Shëndetësisë, 18 prej tyre janë liruar nga spitali, ndërsa 11 mbeten të shtruar, shumica të plagosur gjatë përpjekjeve për të dalë nga ndërtesat.
Tërmeti ndodhi në orën 19:53 (me orën lokale) dhe kishte një thellësi fokale prej 10 kilometrash, sipas AFAD. Ai u ndje gjerësisht në rajonin e Marmarasë, përfshirë Stambollin dhe bregdetin lindor dhe verior të Egjeut.
Në Balıkesir dhe në fshatrat përreth, 16 ndërtesa, përfshirë 4 shtëpi dhe 12 ndërtesa të braktisura, u shembën pa shkaktuar viktima. Sipas AFAD, janë regjistruar të paktën 20 lëkundje pasuese, më e madhja prej tyre me magnitudë 5.0 ballë. 319 ekipe shpëtimi janë angazhuar në operacionet në terren, ndërsa janë raportuar 24 raste dëmesh përmes qendrës emergjente.
Kjo goditje e re vjen ndërkohë që Turqia ende po rikuperohet nga tërmeti katastrofik i shkurtit 2023, ku humbën jetën të paktën 53,000 njerëz, kryesisht në qytetin Antakya.