Një aksident i rëndë trafiku ka marrë jetën e 73 personave, përfshirë 17 fëmijë, në provincën Herat të Afganistanit. Ngjarja ndodhi të martën mbrëma, kur një autobus që udhëtonte drejt Kabulit u përplas me një kamion dhe një motorçikletë, duke shpërthyer më pas në flakë.
Sipas autoriteteve talebane, të gjithë pasagjerët e autobusit humbën jetën, si dhe dy persona nga mjetet e tjera të përfshira. Shumica e viktimave ishin emigrantë afganë të dëbuar nga Irani, të cilët kishin hipur në autobus në qytetin kufitar Islam Qala, sipas zëdhënësit të guvernatorit të provincës, Mohammad Yousuf Saeedi.
Policia lokale fajësoi shpejtësinë e lartë dhe neglizhencën e drejtuesit të autobusit për aksidentin. Ekspertët theksojnë se aksidentet rrugore janë të shpeshta në Afganistan për shkak të infrastrukturës së dëmtuar dhe mungesës së rregullave të qarkullimit.
Në muajt e fundit, Irani ka rritur dëbimet e shtetasve afganë pa dokumente, duke intensifikuar fluksin e refugjatëve drejt Afganistanit. Sipas Kombeve të Bashkuara, që nga janari mbi 1.5 milion afganë janë rikthyer nga Irani, duke rritur presionin mbi burimet e kufizuara të vendit.
Ekspertët paralajmërojnë se Afganistani, nën qeverisjen e talebanëve, nuk ka kapacitet për të menaxhuar këtë valë të madhe të kthimeve, ndërsa mungesa e ndihmave ndërkombëtare thellon krizën humanitare.
