Një aksident i rëndë është regjistruar mëngjesin e sotëm në aksin rrugor Prizren – Suharekë, në kilometrin e 26-të të autostradës “Ibrahim Rugova”.
Përplasja e një kamioni me një makinë ka sjellë vdekjen e drejtueses së mjetit, ndërsa kanë mbetur të plagosur rëndë shoferi tjetër dhe pasagjeri në makinën e viktimës, tha zëdhënësi i Policisë në Prizren, Shaqir Bytyçi.
Policia dhe grupi hetimor ndodhen në vendngjarje ku dhe kanë nisur hetimet për zbardhjen e plotë të rrethanave. Policia e Kosovës u bën apel të gjithëve që të respektojnë rregullat rrugore dhe të shtojnë kujdesin, sidomos për shkak të kushteve të vështira atmosferike.
Aktualisht, akset rrugore të rajonit të Prizrenit janë nën ndikimin e mjegullës së dendur dhe lagështisë, të cilat mund të ulin dukshëm shikueshmërinë dhe kontrollin e mjeteve.
