Një aksident i rëndë rrugor është regjistruar sot (4/8) pak para orës 11:00 të mëngjesit në Itali, në autostradën A1, midis Arezzos dhe Firences, kur një kamion u përplas me disa automjete që kishin ndaluar në rrugë për shkak të trafikut.
Nga aksidenti tragjik mbetën të vrarë 3 persona, ndërsa 15 mbetën të plagosur.
Sipas informacioneve fillestare, kamioni nuk arriti të frenonte në kohë e për pasojë goditi automjetet që ndodheshin në autostradë njëra pas tjetrës, përfshirë një kamion tjetër, një makinë kampingu, një autobus turistik dhe një ambulancë.
Ambulanca po transportonte një pacient 75-vjeçar. Përplasja e dhunshme vrau pacientin, si dhe dy punonjës shpëtimi që ishin në pjesën e pasme të automjetit, raportojnë mediat italiane.
