Autoritetet vietnameze kanë urdhëruar evakuimin e më shumë se 586,000 banorëve ndërsa tajfuni Kajiki po i afrohet me shpejtësi brigjeve të vendit.
Stuhia po shoqërohet me erëra që arrijnë deri në 166 km/h dhe pritet të forcohet më tej përpara se të godasë tokën ditën e sotme, sipas parashikuesve të motit.
Banorëve në provincat qendrore Thanh Hoa, Quang Tri, Hue dhe Da Nang u është kërkuar të largohen nga shtëpitë e tyre. Fluturimet janë anuluar dhe anijeve u është ndaluar të largohen nga bregu.
Stuhia po kalon pranë Hainanit të Kinës, ku autoritetet parashikojnë reshje të dendura, deri në 320 mm shi.
Autoritetet kanë njoftuar se banorët që ndodhen në shtegun e parashikuar të tajfunit duhet të qëndrojnë brenda pas orës 14:00 GMT të dielën. Ndërkohë, forcat ushtarake janë dislokuar për të ndihmuar në operacionet e evakuimit dhe garantimin e sigurisë.
“Situata është jashtëzakonisht e rrezikshme dhe jo e sigurt për asnjë automjet apo strukturë, siç janë anijet turistike ose të peshkimit dhe objektet e rritjes së akuakulturës”, tha një zyrtarë nga ministria e bujqësisë dhe mjedisit.
Vietnam Airlines ka anuluar të paktën 22 fluturime nga dhe drejt qyteteve qendrore për të dielën dhe të hënën.
