Moderatorja Arbana Osmani ka reaguar për herë të parë pas disa ditësh heshtjeje lidhur me situatën e krijuar në Shqipëri dhe protestat e fundit, duke i bërë një thirrje të drejtpërdrejtë kryeministrit Edi Rama.
Në një postim në rrjetet sociale, ajo shkruan se zhvillimet e ditëve të fundit nuk duhen trajtuar si një spektakël që komentohet nga shtëpia, por si një situatë që kërkon të kuptohet përpara se të jepet një reagim.
Si nënë e tre fëmijëve, moderatorja shprehet se e dhemb të shohë të rinj, disa prej tyre në moshën e djalit të saj, të përfundojnë të dhunuar dhe të lënduar gjatë protestave. Ajo shpreh gjithashtu shqetësimin për pamjet e Tiranës së përfshirë nga përplasjet dhe shkatërrimet.
“Kam zgjedhur të hesht këto ditë, për të kuptuar më mirë se ç’po ndodh; sepse mendoj se ajo që po ndodh sot në Shqipëri nuk është një reality shoë që duhet komentuar me tifozllëk nga divani i shtëpisë, as një mundësi për t’u shfaqur populiste me statuse për më shumë likes në Instagram.
Duhet kuptuar, për të reaguar.
Si një nënë e 3 fëmijëve, më dhemb të shoh të rinjtë e pashpresë, disa prej tyre në moshën e djalit tim, të rrihen dhe lëndohen duke marrë dhunën si të vetmen përgjigje për kërkesat e tyre legjitime, ashtu siç më dhemb të shoh Tiranën të digjet për të disatën herë në këto 30 vite.
Unë nuk kam besuar dhe nuk besoj kurrë se dhuna është zgjidhja. Këtë e mendoj qoftë për ata policët që tentojnë të shpërndajnë turmat me shkopinj gome, qoftë për ata që shkatërrojnë institucione e biznese që iu përkasin të gjithëve, qoftë dhe për plot miq e mikesha të Instagramit që me statuset e tyre populiste justifikojnë dhunën.
Por si qytetare e këtij vendi ku kam vendosur të rris fëmijët e mi, sot më shumë se kurrë ndjej t’i them me zë të lartë kryeministrit:
“Mjaft; respekto popullin tënd, dëgjoje.”
Askush nuk e meriton këtë”, shkruan Osmani.
