Kryeministri Edi Rama ka dhënë sinjale se do të ketë ndryshime thelbësore në qeverinë e re, qoftë në aspektin e emrave, ashtu dhe në aspektin e ndërtimit të ministrive. Më 11 shtator do të mbahet asambleja e PS ku do të prezantohen ministrat dhe Rama për herë të parë ka folur sot mbi atë që pritet të ndodhë.
I ftuar në “Opinion”, ai tha se do të ketë një miksim mes figurave me eksperiencë dhe figurave të reja. Po ashtu Rama tha se qeveria e re do të reflektojë rezultatin e 11 majit.
-A e ke gati qeverinë? E ke në kokën tënde se unë s’po të pyes për emrat se me siguri s’do ma japësh?
Besoj që në datën 11.
-Do të ketë ndryshime të mëdha?
Shiko, një gjë është e sigurt që nuk pres të vijë njeri nga qielli. Njerëzit janë…
-Do të jetë qeveri politike apo teknike më shumë?
Qeveri politike janë të gjitha për sa kohë është qeveria e një partie…
-Dakord, por e kam fjalën njerëz nga parlamenti apo do të vijnë njerëz nga jashtë që ushtrohen kryesisht përmes aftësive teknike që kanë?
Ne kemi një mandat unik në aspektin që jemi e para forcë politike që ka 12 vjet eksperiencë qeverisëse të pandërprerë. Ky është një aset shumë i madh për ta përdorur sepse eksperienca e 12 vjetëve është e jashtëzakonshme. Ka një libër të famshëm Malcolm Gladwell që thotë “kush nuk i ka bërë 10 mijë orë punë në atë që bën, nuk e bën dot punën mirë” dhe kemi njerëz me shumë eksperiencë, kemi njerëz të tjerë që kanë më pak eksperiencë, por që mund të sjellin më shumë, kështu që në fund të ditës…
-Pra do të kesh një miksim midis të dyjave?
Në fund të ditës, qeveria do të jetë një përzgjedhje që do të reflektojë qoftë vullnetin e 11 majit, qoftë aspiratat e 11 majit, qoftë edhe ambicien time që ne të sillemi me arritjet si opozitë.
-A do të ketë surpriza, emra të rinj që ne s’i presim se pritshmëritë janë brenda grupit parlamentar?
Kam parë që duhen fshirë të gjithë, duhen sjellë ca të tjerë.
-Secili ka mendimin e vet, po pyes realisht, a do të ketë surpriza?
Do të jetë qeveri e re. Besoj që jo çdo ministër apo ministre e ka parë veten në këto thashethemet se ka edhe ndonjë që nuk është përfolur fare si mundësi që të jetë aty.
-Do e ruash balancën midis grave dhe burrave?
Po pa këtë ne nuk jemi Partia Socialiste.
-A do të shmangen ministrat që ndiqen nga SPAK për të vazhduar karrierën politike në ekzekutiv?
Nuk di të kemi ndonjë ministër që ndiqet nga SPAK-u me thënë të drejtën.
-Çështje që SPAK-u mund t’i hapë në çdo moment.
SPAK-u mund të hapë në çdo moment çfarë të dojë, ne do të vazhdojmë punën tonë.