Një burrë që ushtroi “mizori të tmerrshme” ndaj gjashtë fëmijëve të tij, duke përfshirë edhe mbylljen e njërit prej tyre në një frigorifer, është dënuar me nëntë vite e dy muaj burg.
Një detektive që punoi në këtë çështje i tha Gjykatës Penale të Dublinit se ky ishte një nga rastet më tronditëse që kishte hasur gjatë dhjetë viteve punë në mbrojtjen e fëmijëve.
Sipas gjykatës, fëmijët shpesh mbeteshin pa ushqim ose nuk kishin mjaftueshëm për të ngrënë, ndërsa shtëpia ishte në kushte të mjerueshme, e ftohtë dhe e mbushur me mbeturina, shkruan “Daily Star”.
Policia dhe punonjësit socialë konstatuan praninë e minjve, mizave dhe papastërtive gjatë vizitave në banesë. Gjashtë fëmijët – dy djem dhe katër vajza – ishin të dobët, të zbehtë, të papastër dhe të veshur keq për moshën e tyre.
Vajza më e vogël, vetëm disa muajshe në atë kohë, u shtrua në spital e mbuluar me papastërti. Fëmijët u morën në përkujdesje nga shteti në janar të vitit 2020, kur ishin nga 10 muajsh deri në 8 vjeç. Gjykata dëgjoi gjithashtu se të dy prindërit përdornin alkool dhe drogë në shtëpi.
Fëmijët sot janë nga 6 deri në 14 vjeç dhe jetojnë në tre familje të ndryshme kujdestare. Burri 35-vjeçar pranoi gjashtë akuza për keqtrajtim të fëmijëve gjatë periudhës 2016–2020.
Ai ishte akuzuar edhe për sulme seksuale ndaj disa prej fëmijëve, por këto akuza u hoqën nga prokuroria gjatë seancës së dënimit. Burri ka një të kaluar kriminale me rreth 20 dënime të mëparshme, kryesisht për shkelje të rendit publik.
Për të mbrojtur identitetin e fëmijëve, emri i tij nuk është bërë publik.
Nëna e fëmijëve, gjithashtu 35 vjeç, u dënua me dy vite e gjysmë burg në vitin 2025 pasi pranoi neglizhencën ndaj fëmijëve.
Gjykata dëgjoi se djali më i madh, i cili ishte shtatë vjeç kur u mor në kujdes, ishte viktima e trajtimit më brutal. Ai u privua nga ushqimi, u mbyll në dhomë, në banjë, në dollap dhe madje edhe në një frigorifer në funksion. Babai gjithashtu tentoi ta mbyste dhe shpesh i mbante kokën nën ujë në vaskë.
Në deklaratën e tij para gjykatës, djali – sot 13 vjeç – tha se babai duhet të dënohet “mbi 30 vite burg” për atë që i ka bërë atij dhe motrave e vëllezërve të tij. “Nuk dua që ai t’a bëjë këtë me fëmijë të tjerë”, u shpreh ai.
Fëmijët kanë përjetuar pasoja të rënda fizike, emocionale dhe psikologjike. Ata kanë probleme me besimin, ushqimin dhe shkollën. Edhe pse tani ndihen të sigurt në familjet kujdestare, vuajnë faktin që nuk jetojnë bashkë.
Gjykatësja theksoi se kjo ishte një shkelje e rëndë dhe e përsëritur e besimit prindëror ndaj fëmijëve të pambrojtur, duke e cilësuar rastin si “jashtëzakonisht të rëndë”. Ajo shtoi se fëmijët janë tashmë në ambiente të sigurta dhe të dashura, dhe u uroi atyre një të ardhme më të mirë.
Sipas mbrojtjes, burri ka pranuar fajin dhe ka kërkuar falje, duke thënë se tani ka ndjekur trajtim për varësinë nga droga. Megjithatë, gjykata e konsideroi të nevojshme një dënim të gjatë për shkak të natyrës së rëndë dhe të vazhdueshme të abuzimit.
Comments are closed.