Një ngjarje e rëndë tronditi vendin ditën e djeshme (24 Korrik) ku u zbulua se 26-vjeçarja Ermalinda Rama kishte mbytur me tel babain e saj dhe vdekjen e kishte raportuar si aksidentale.
Krimi ndodhi mbrëmjen e 23 Korrikut, ku vajza kishte deklaruar se i ati ishte rrëzuar në banjë, por shenjat në fyt të viktimës zbuluan të vërtetën shokuese.
Motra e 26-vjeçares (vajza tjetër e viktimës) ka rrëfyer momentin kur Ermalinda e telefonoi për t’i thënë që babai i saj, Anesti Rama, ishte rrëzuar.
Ajo u shpreh se pas kësaj, 26-vjeçarja i mbylli celularin, ndërsa telefonoi nënën e saj Valbona Rama ( e arrestuar si bashkëpunëtore në vrasje pasi dyshohet se pastroi trupin e viktimës për të fshehur trupin), e cila i konfirmoi se i ati kishte vdekur.
“Më mori motra në telefon dhe më tha që babi ka rënë në banjë, më pas e fiku telefonin, marr mamin në telefon dhe i them është gjallë? Jo më tha ka vdekur, flisja shpesh në telefon nuk pashë të kishte gjë, nuk kuptova as edhe një gjë, me babin kam folur gjithmonë”, tha ajo për TCH.
Vajza e 56-vjeçarit shtoi se i ati jetonte në shtëpi së bashku me të motrën dhe nënën e saj.
Kryeplaku i fshatit ka treguar se nënën e bijë e dhunon viktimën, si edhe e linin pa bukë. Madje shtoi ai, Anesti Rama i kishte thënë që donin ta nxirrnin nga shtëpia.
“Anesti ka qenë burrë i mirë, punëtor, por ka pasur probleme familjare me gruan, fëmijët. Nuk shkonte mirë. Arrinte sa e linin pa bukë të shkretin, ankohej tek unë. ‘Duan të më nxjerrin nga shtëpia’ më thoshte. Ata merrnin ndihmë ekonomike, i kam ndihmuar.
Kush e di sa herë ka shkuar policia në shtëpinë e tyre. Unë nuk dija gjë, kur shkova afër banesës ishin të krimeve aty. Thanë se i kishte rënë infarkt, por e kishin mbytur. Na ka ardhur të gjithëve keq, se ishte djalë pa llafe, punëtor. Ato nuk e trajtonin mirë. Viktima punonte në një firmë private.
Ai vetëm ankohej i shkreti. E rrihnin, godisnin në syrin tim. Ça të them unë… ato ha, pi ,rri dhe punonte ai i shkreti. Jemi të prekur shumë si fshat. Janë tre vëllezër këta. Njëri prej tyre e mori në Greqi ku punoi atje dhe bëri shtëpinë. Familja i thoshin ‘ik nga shtëpia, s’të duam’,”– u shpreh kryeplaku i fshatit Frashër të Fierit.