Mediat në Kosovë raportojnë se Valon Ademi, biznesmen i lidhur me investime të përfolura rreth Aeroportit të Vlorës, është përfshirë në një incident të dhunshëm mbrëmjen e kaluar në Prishtinë.
Sipas raportimeve, ngjarja ka ndodhur në orët e vona të natës, në një lokal në kryeqytetin e Kosovës, ku pas një mosmarrëveshjeje mes palëve, situata është përshkallëzuar në konflikt fizik.
Burime mediatike bëjnë me dije se Ademi dyshohet se ka goditur me grusht në fytyrë Sokol Havollin, i cili mban postin e drejtorit të Investimeve Kapitale në Komunën e Prishtinës, duke i shkaktuar lëndime trupore.
Pas incidentit, Havolli raportohet se është paraqitur në Polici, ku ka dhënë deklaratë lidhur me rastin.
Mediat kosovare kanë tentuar të marrin një reagim edhe nga vetë Havolli, por deri në momentin e publikimit të lajmit, ai nuk ka kthyer përgjigje.
Sokol Havolli është një emër i njohur në institucionet e Kosovës, pasi më herët ka mbajtur disa pozicione publike, përfshirë atë të zëvendësguvernatorit të Bankës Qendrore të Kosovës dhe drejtuesit të ndërmarrjes publike “Parking Prishtina”.
Ai ka qenë gjithashtu kandidat për deputet në zgjedhjet e fundit parlamentare, por nuk ka siguruar mandat. JOQ
Comments are closed.