Analisti i njohur, Frrok Çupi zbulon detaje tronditëse mbi dosjen e 21 Janarit dhe rolin e Sali Berishës. Ai paralajmëroi në një intervistë për “Abc News” se ish-kryeministri mund të thirret së shpejti nga Prokuroria e Posaçme (SPAK) dhe nuk mund të dalë më i pa burgosur, duke e konsideruar këtë si një moment historik dhe një fitore për drejtësinë dhe viktimat e asaj ngjarjeje tragjike. Çupi thekson se Gjykata e Strasburgut ka cilësuar masakrën e 21 Janarit 2011 si vrasje shtetërore, duke konstatuar mungesën e hetimeve ndaj autorëve, dhe nënvizon rëndësinë e provave që i janë dorëzuar drejtuesit të SPAK, Altin Dumani nga Shtetet e Bashkuara të Amerikës.
-Ka qenë Gjykata e Strasburgut, zoti Çupi, që e ka cilësuar 21 Janarin si vrasje shtetërore dhe ka kërkuar që shteti shqiptar të përcaktojë autorët e këtij krimi, duke theksuar se ndaj tyre nuk është kryer asnjë hetim dhe nuk janë ngritur akuzat. Mendoni se pas Bashës më në SPAK e ka radhën Berisha? Dhe nëse Basha u paraqit pa telefon, a mendoni se nesër Berishës do t’i vihen prangat?
Varet se çfarë strategjie do të ndjekë hetimi dhe çfarë strategjie do të ndjekë akuza. Nëse do të thirret Sali Berisha, besoj se nuk thirret menjëherë. Besoj se thirret pas disa ditësh, por kur thirret Berisha, nuk mund të dalë më i pa burgosur. Pa dyshim, do të shkojë në burg me pranga. Është krim i madh. Është dhe fitore e madhe. Ata djem dhe ata burra që dhanë jetën nën plumbat e Sali Berishës tashmë, nëse besojmë sadopak, ndodhen në altarin e nderit të kombit. Më në fund, njerëzit në Shqipëri kuptuan se ku ishin, çfarë bënin, çfarë kishte ndodhur. Ndërsa thirrja e zotit Basha do shoqërohet me thirrjen e shumë njerëzve. Me sa di unë, ka plot vullnetarë të cilët nuk janë dukur deri më sot. Ka plot vullnetarë, që janë gati të shkojnë të dëshmojnë për atë çfarë kanë parë dhe çfarë kanë ndjerë. Kjo e vendos çështjen në seriozitetin e saj.
Ky nuk është një gjyq që mbështetet thjesht mbi paragrafë. Është një gjyq që mbështetet mbi nderin e kombit. Është një gjyq që mbështetet mbi dhimbjen e njerëzve. Është një gjyq që mbështetet mbi faktin që Sali Berisha i mori këtij populli 30 e ca vjet. Ia vodhi, ia rrëmbeu, ia vrau. Nuk është se i tha popullit: “Më jep dhe ja po t’i jap,” por i mori gjak njeriu. Sali Berisha do ishte fajtori më i lehtë për vjedhje, gjë që është ordinere në këtë gjë. Sali Berisha është vrasës dhe po dëshmohet. Domethënë, ne kemi mbajtur nëpër salla parlamenti, nëpër konferenca shtypi, nëpër këngë popullore, nëpër parlamente, nëpër presidenca, një njeri që vret civilët, që vret popullin e vet. Dhe ky moment është një moment reflektimi. Fatkeqësisht, ata katër njerëz nuk jetojnë më dhe të tjerët janë të gjymtuar, por është një moment reflektimi për këdo në vendin tonë.
–Zoti Çupi, kur flasim për krim shtetëror, sigurisht kemi parasysh të gjithë zinxhirin komandues: si drejtor policie, komandant garde, ministër, apo edhe ish-kryeministër i asaj kohe. Deri tani të gjithë duket se janë pyetur. I vetmi që nuk është pyetur është Berisha. Mendoni se është një strategji e SPAK që e lë Berishën të fundit, apo kanë diçka tjetër?
Besoj se strategjia e SPAK-ut deri më sot, realisht e ka lodhur nervin e njeriut. Madje, edhe mua që flas kështu, më ka bërë shpeshherë të mos besoj, megjithëse jam besimplotë ndaj drejtësisë. Dhe herë pas here e kam menduar këtë gjë, domethënë që Sali Berisha nuk vihet në pranga për arsye se bëri luftë civile në PD. Sali Berisha nuk vihet në pranga sepse shpenzon para pafund për lobingjet e tij. Sali Berisha nuk vihet për shkak se paguan ushtarët e tij për të terrorizuar shtetin dhe njeriun. Por pritet një gjë shumë e madhe. Gjëja e madhe është kjo: Do jenë tre ditë, do jenë pesë ditë. Me siguri, dosja e datës 21 Janar do ketë shkuar për gjykim dhe Sali Berisha do të jetë në arrest, pa dyshim. Desha t’ju them një gjë për pyetjen që bëni. Kjo vrasja e 21 Janarit është një plumb që ka përshkruar gjithë nervin e shoqërisë, e ka prekur tërë nervin e shoqërisë. Po them se cili është nervi i kësaj shoqërie: Ka prekur mjekët; ju e dini, në vend që mjekët të jenë humanë, janë kriminelë. Ka prekur gazetarët, i ka kthyer në viktima dhe në vëzhgues serioz.
Ka prekur mediat që i ka kthyer në bashkëpunëtorë të qeverisë në krim, sepse kanë fshirë serverat—vetëm specialistët e mediave në Shqipëri ishin të zonjat ta bënin atë gjë. Ka prekur Gardën; Garda e Republikës nuk ka më moral të thotë se jam Garda e Republikës—duhet të ndryshojë emrin menjëherë. Ka prekur kategori të tjera deri te prokurorët dhe kryeprokurorët. Ka prekur Presidentin e Republikës. Ai ankohej se po më vrasin dhe nuk ngrinte botën në këmbë se në Shqipëri ndodhi krimi më i madh i shekullit. Dhe më në fund ka prekur Qeverinë/Kryeministrin, i cili është i ngarkuar që në atë moment.
Është i ngarkuar të paktën me tre krime të rënda: E para, për vrasje; e dyta, për fshehjen e provave; dhe e treta, për armëmbajtje pa leje dhe për tentativë për të vrarë kryetarin e opozitës (Në atë kohë ishte Edi Rama). Domethënë, ai ishte një plumb që preku tërë trupin e shoqërisë. Me këtë rast, nxirret plumbi. Prandaj ju thashë që është një ngjarje shumë epokale: nxirret nga trupi i shoqërisë ai plumb i rëndë i tmerrshëm që po e mban në infeksion dhe shoqëria ecën me ndërgjegje normale njerëzore, kombëtare dhe të drejtësisë.
–Zoti Çupi, Kryeprokurori i SPAK, i cili po merr pjesë në hetimet e kësaj çështje, pak kohë më parë qëndroi në Shtetet e Bashkuara të Amerikës, ku zhvilloi edhe një vizitë zyrtare atje. Por nga ana tjetër, FBI ka qenë e para që zbuloi fshirjen e serverit të Kryeministrisë dhe gjithashtu ekspertimin e armëve të gardistëve. A mendoni ju se pikërisht Altin Dumanit janë dhënë prova shtesë në Shtetet e Bashkuara të Amerikës për dosjen e 21 Janarit?
Ajo çfarë është hapur e njohur, është se një nga ngjarjet më të rëndësishme dhe më të vëmendshme ku kanë qenë Shtetet e Bashkuara ka qenë kjo ngjarje. Shtetet e Bashkuara kanë qenë prezente me ambasadën. Kanë qenë prezente në atë ngjarje me ushtarët dhe me vullnetarët e Korpusit të Paqes. Amerika ka ditur gjithçka për këtë gjë. Kjo është dhe arsyeja, për mendimin tim, pse Amerika ka bërë rolin, në dukje rolin e ariut që fle. Por ndërkohë ka nxitur në mënyrë sa më të fuqishme, ka investuar drejtësinë në Shqipëri, dhe drejtësia në Shqipëri është investuar për 21 Janarin. Kjo është arsyeja themelore pse është investuar, dhe interesimi i Amerikës është një gjë për t’u mbajtur mend dhe për t’u falënderuar gjatë gjithë kohës.
-Ka qenë një deklaratë e asaj kohe e ambasadorit amerikan ku Berishën e cilëson burrë shteti. Pse mendoni se ka ardhur në atë kohë një deklaratë e tillë nga Amerika, kur ju thoni këtë gjë?
Besoj se në një nga intervistat e atij ambasadori, por ajo çfarë dinim ato ditë, është se ambasadori i Shteteve të Bashkuara ose Shtetet e Bashkuara kishin informacion se Sali Berisha ishte kthyer tek vetja dhe ishte armatosur për të vrarë dhe po jepte urdhra për të vrarë. Kështu që në Shqipëri do bëhej një kasaphanë nëse nuk do përkëdhelej sedra e njeriut përbindsh. Berisha shikonte nga rruga e Elbasanit te ambasada amerikane, çfarë do të thotë për atë gjë. Në qoftë se do të shikonte fytyrë të zymtë në Ambasadën Amerikane, Sali Berisha do t’i hynte me gjithë armë. Sali Berisha kishte armë; sot e kësaj dite ka militantë të armatosur. Atëherë kishte gjithë kushërinjtë, nipat e njerëzit e vet.
Vetë Berisha deklaroi: “Kam snajperin në dorë”. “Unë kam snajperin në dorë dhe sapo të lëviz kryetari i opozitës, do ta vras”. Dhe ai ishte dhe më i gjatë se të tjerët dhe e vriste shumë kollaj. Ky është problemi. Ndërsa pjesa tjetër pastaj, domethënë FBI dhe specialistë të tjerë në Shtetet e Bashkuara të Amerikës, gjatë gjithë kohës e kanë parë Berishën si një budalla. E kanë parë Berishën si një budalla kur mburrej dhe krekosej se i ka zhdukur provat dhe se e ka fshirë serverin. Ata i kishin në dorë të gjitha provat, dhe serverin e riparuan, e rigjeneruan, dhe e kishin tërësisht në dorë. Ky qeshte këtej dhe ata qeshnin andej. Ky qeshte me gëzim se u hodh amerikanëve.
–Dhe pikërisht ky server, mendoni se i është dorëzuar Altin Dumanit?
Po, patjetër. Sepse ishin provat e reja, provat e fundit. Altin Dumani po shkonte drejt fundit të mandatit. Është i vetmi prokuror i besueshëm për 21 Janarin. Është i vetmi prokuror i qartë, i cili qe atë ditë ka bërë të pamundurën, siç ishte i vetmuar, të paktën e ka çuar çështjen, e ka arritur të bëjë rekurs për atë çështje. Aq mund të bëjë dhe një njeri. Pastaj atë gjë e bëri më në fund Gjykata e Strasburgut, e cila konsideroi, identifikoi autorin, dhe tha që është Qeveria. Krim shtetëror do të thotë krimi i Qeverisë. Sot.com.al