Italia do të përballet të hënën, më 18 maj, me një grevë të përgjithshme 24-orëshe që pritet të shkaktojë probleme të mëdha në transportin publik, hekurudha, shkolla, spitale dhe zyra shtetërore. Greva është organizuar nga sindikatat italiane dhe përfshin punonjës të sektorëve të ndryshëm në të gjithë vendin.
Sindikatat italiane që organizojnë protestën kërkojnë ndërprerjen e përfshirjes së Italisë në konfliktet ndërkombëtare dhe ndalimin e industrisë së lidhur me riarmatimin, duke kërkuar që fondet të përdoren për paga, pensione, shërbime publike, siguri në vendin e punës dhe strehim social.
“Njerëzit po paguajnë pasojat e luftës përmes pagave që humbasin vlerën, shëndetësisë publike të dobësuar, shkollave të varfra, uljes së mirëqenies sociale, rritjes së qirave, çmimeve dhe kostos së karburantit që rëndon gjithnjë e më shumë mbi familjet”, thuhet në deklaratën e sindikatave.
Ndër sektorët më të prekur pritet të jetë transporti hekurudhor. Grupi Trenitalia bëri të ditur se greva do të prekë personelin nga ora 21:00 e së dielës deri në orën 21:00 të së hënës, duke paralajmëruar anulime dhe vonesa të shumta në trenat kombëtarë dhe rajonalë.
Probleme priten edhe në transportin urban në qytete si Romë dhe Milano, ku autobusët, tramvajet dhe metroja mund të pezullohen pjesërisht gjatë ditës. Në Romë, kompania ATAC njoftoi se shërbimi do të garantohet vetëm në fashat e detyrueshme ligjore, nga fillimi i shërbimit deri në orën 08:29 dhe më pas nga ora 17:00 deri në 19:59.
Edhe në Milano, kompania ATM paralajmëroi ndryshime dhe anulime në linjat urbane gjatë gjithë ditës. Greva do të prekë gjithashtu sektorin e shëndetësisë dhe arsimit. Vizitat mjekësore, analizat laboratorike dhe ndërhyrjet jo urgjente mund të shtyhen, ndërsa funksionimi i shkollave do të varet nga niveli i pjesëmarrjes së mësuesve dhe stafit administrativ në protestë.
Probleme priten edhe në administratën publike, ku zyrat komunale, sportelet e sigurimeve shoqërore dhe agjencitë tatimore mund të punojnë me orar të reduktuar ose të qëndrojnë të mbyllura.
