E hëna është parashikuar si dita më e nxehtë e javës, ku sipas sinoptikanëve termometri pritet të arrijë deri në 38°C.
Në ditët në vijim, parashikohet një rënie graduale e temperaturave, ku nga e marta deri të premten, vlerat maksimale do të luhaten mes 34 dhe 36°C, me ndryshime të lehta prej 1 deri në 1.5 gradë.
Megjithatë, temperaturat do të mbeten mbi mesataren sezonale, veçanërisht në zonat e ulëta, përfshirë edhe kryeqytetin, ku pritet të regjistrohen temperatura pranë 34°C.
Berati, Elbasani dhe Gjirokastra do të jenë ndër zonat që do të përjetojnë vlera mjaft të larta gjatë gjithë javës.
Moti do të jetë kryesisht i qëndrueshëm, me intervale të gjata me diell në të gjithë vendin.
Këto intervale do të jenë më të dukshme në zonat bregdetare, por do të prekin edhe zonat e ulëta dhe malore.
Herë pas here, gjatë pasditeve, priten kalime të lehta vranësirash, të cilat mund të sjellin reshje të pakta dhe të izoluara në juglindje, veçanërisht në qarkun e Korçës.
Këto reshje do të jenë afatshkurtra dhe të përkohshme.
Për ata që kanë zgjedhur të kalojnë pushimet në bregdet, kushtet atmosferike do të jenë mjaft të favorshme, me diell të bollshëm dhe erë me intensitet minimal, sipas parashikimeve të sinoptikanëve.