Namir Laprdhaja, gazetari dhe analisti i njohur që mbylli sytë pak ditë më parë në Gjermani, do  të prehet nesër në banesën e fundit, në varrezat e Burdullias në Berat. Familja ka hapur dyert për miqtë, kolegët dhe gjithë të njohurit e Namirit.

Homazhet kanë nisur sot dhe do të vazhdojnë edhe nesër te Pallati i Kulturës, deri në orën 13:00, kur trupi i gazetarit do të përcillet mes dhimbjes dhe trishtimit në banesën e fundit.

Ikja e tij e parakohshme dhe e papritur, në moshën 40 vjeçare, ka tronditur mbarë opinionin publik, kolegët, lexuesit e tij të shumtë dhe padyshim familjen; dy prindërit, bashkëshorten, vajzat e tij dhe dy motrat që humbën vëllain e vetëm.

Namir Lapardhaja ka mbyllur sytë përgjithmonë pas një arresti kardiak në gjumë. Ai nuk është zgjuar më në mëngjes për të dhënë “dritën jeshile” për artikujt që do të publikoheshin mëngjesin e 19 Marsit në Gazetën Tema, aty ku punonte si redaktor.

Kolegët e kishin telefonuar vazhdimisht, por në anën tjetër telefonin nuk e ngriti askush, derisa familja njoftoi se Namiri kishte ndërruar jetë.

Për të gjithë që e njohën, përgjatë gjithë jetës së tij, spikati për profesionalizmin, analizat e paanshme dhe kritikat e drejtpërdrejta. Namir Lapardhaja ishte një ndër ata njerëz që nuk i shmangej kurrë debatit, sidomos kur bëhej fjalë për zhvillimet politike në vend.

Ai ka qenë aktiv në jetën publike, dhe e ndau kohën mes mësimdhënies, gazetarisë dhe angazhimit qytetar në Berat.

Zemra e tradhtoi në gjumë, trupi i Namirit vjen në Berat! Dalin detajet e trishta! Babai i dy vajzave mbylli sytë në Gjermani në moshën 40 vjeçare

© Newsbomb.al