Vdekja e Ismet Habilit, i cili u gjet i pajetë mbrëmjen e djeshme brenda automjetit të tij në Tiranë, ka qenë në qendër të vëmendjes së opinionit publik. Ngjarja ka ngritur pikëpyetje të shumta, ndërsa ende nuk ka një përfundim zyrtar që të përcaktojë nëse bëhet fjalë për vrasje apo vetëvrasje. Gjetja e një arme zjarri në vendngjarje ka ngritur dyshimet për një akt vetëvrasjeje, por rrethanat e plota të vdekjes mbeten për t’u sqaruar nga hetimet.
Ndërkohë, paralelisht me lajmin për ngjarjen, në media qarkulloi me shpejtësi pretendimi se Ismet Habili kishte qenë shofer i deputetit socialist Eduard Shalsi. Ky informacion u mohua nga vetë ligjvënësi, i cili hodhi poshtë raportimet për një marrëdhënie të tillë pune. Por ndërsa diskutimet u përqendruan te lidhja e pretenduar me deputetin, një tjetër detaj del në dritë për të shkuarën profesionale të Ismet Habilit.
Nga të dhënat e Qendrës Kombëtare të Biznesit, të siguruara nga redaksia, rezulton se një person me emrin Ismet Habili kishte regjistruar më 13 gusht 2020 një biznes privat në Tiranë, me formë ligjore “Person Fizik”. Aktiviteti i regjistruar ishte “tregtia me pakicë e artikujve ushqimorë të ngrirë”, ndërsa vendi i ushtrimit të tij ndodhej në rrugën “Siri Kodra”, në ambientet e ish-Frigoriferit në kryeqytet.
Sipas të njëjtave të dhëna, biznesi rezulton i pezulluar për periudhën 2022–2032. Kjo do të thotë se subjekti ishte regjistruar rreth gjashtë vite më parë, ndërsa pezullimi i aktivitetit kishte nisur në vitin 2022. Ndërkohë, pritet që hetimet dhe ekspertizat përkatëse të sqarojnë përfundimisht rrethanat në të cilat Ismet Habili humbi jetën.
Të dhënat në QKB
