Ditën e sotme vendi ynë do të ndikohet nga kushte atmosferike të paqëndrueshme. Moti parashikohet me vranësira mesatare deri të dendura. Në orët e mbrëmjes mot me kthjellime dhe vranësira të përqendruara vetëm në veri të vendit.
Reshjet e shiut parashikohet të jenë prezente që në orët e para të 24-orëshit, fillimisht në veriperëndim të vendit e gradualisht do të shtrihen edhe në zonën perëndimore dhe atë qendrore. Sinoptikania Lajda Porja tha se pas reshjeve të dendura të mëngjesit, pritet që të nisë dhe largimi i reve dhe të rikthehet dielli në qiellin shqiptar.
“Parashikohet që reshjet nga ky moment që po flasim dhe në vijim të intensifikohen nga zonat jugore, sepse Jugu nuk ka pasur reshje gjatë natës.
Kështu që Tirana nga tani që flasim presim që të ketë ndonjë interval të shkurtër reshjesh deri në orët e pasdites dhe mund të mos ketë fare reshje, pasi shkarkimet e mëngjesit kanë qenë të bollshme.
Pra, presim përmirësim të motit nga veriu deri në qendër dhe të përkeqësohet pak situata në jug. Kështu që nga momenti në moment ne presim që të kemi dhe intervale të shkurtra me kthjellime, çarje të qiellit dhe largim të reve, por do të kemi herë pas here kthjellime të shkurtra. Nuk është se do të kemi një ditë me shumë diell, pasi vranësirat do të jenë prezente, por mund të them që nga ky moment nis një përmirësim i dukshëm i motit. Ndërsa nesër nuk ka reshje”, u shpreh Lajda Porja
