Kapet në flagrancë në Itali një 25-vjeçar shqiptar, i dyshuar për trafik droge
Një i ri shqiptar 25 vjeç ka rënë në prangat e policisë italiane në qytetin Fano, pas dyshimeve për përfshirje në aktivitet të paligjshëm të shpërndarjes së drogës. Ai u kap së bashku me partneren e tij 22-vjeçare, pas një operacioni të organizuar nga forcat e rendit.
Hetimet nisën pas një denoncimi nga një banor i zonës, i cili kishte vënë re praninë e dyshimtë të çiftit që vizitonte shpesh një zonë të caktuar me makinë. Kjo solli një kontroll të menjëhershëm nga ana e policisë, e cila ndaloi automjetin e tyre. Gjatë kontrollit të makinës nuk u gjet asnjë provë që mund të çonte në ndonjë akuzë të drejtpërdrejtë.
Por policia vendosi të vazhdojë kërkimet në terren, duke përfshirë në operacion edhe një qen antidrogë. Pas disa minutash kontroll në një zonë të pyllëzuar, u gjet një qese plastike e fshehur në mënyrë profesionale nën bimësi dhe në tokë. Brenda saj ndodheshin 300 gram kokainë, një peshore elektronike, dhe qese të vogla plastike, që përdoren zakonisht për ndarjen dhe paketimin e lëndëve narkotike.
Pas këtij zbulimi, policia vendosi të vendoste në vëzhgim vendin ku ishte gjetur droga. Disa orë më vonë, dy të rinjtë u kthyen në të njëjtën zonë. Vajza qëndroi në automjet, ndërsa i riu iu afrua pikës ku më herët ishte gjetur lënda narkotike, duke marrë një pjesë të saj.
Në atë moment, forcat policore ndërhynë duke arrestuar në flagrancë të dy personat. Ata aktualisht ndodhen në paraburgim, ndërsa autoritetet italiane kanë nisur hetimet për të zbuluar nëse dyshja është pjesë e një rrjeti më të gjerë trafiku droge.