Drejtuesi politik i Partisë së Lirisë në qarkun e Beratit, Lefter Maliqi, ka reaguar ashpër pas rezultatit zhgënjyes të Partisë Demokratike në zgjedhjet e 11 majit, duke lëshuar një mesazh të qartë për reformim të thellë në strukturat drejtuese të kësaj force politike. Në një prononcim për mediat, Maliqi nuk kurseu kritikat për drejtuesit aktualë të PD-së, duke kërkuar dorëheqje të menjëhershme në të gjitha nivelet, si në qendër ashtu edhe në bazë, ndërsa paralajmëroi vendime të forta politike në vijim.
Sipas tij, PD ka pësuar një rënie të thellë dhe të dhimbshme në besueshmëri, çka e bën të domosdoshme një riorganizim të plotë. Maliqi theksoi se partia duhet të çlirohet nga “emrat e konsumuar” që, sipas tij, nuk kanë sjellë as frymë, as mobilizim elektoral dhe janë shkaktarët kryesorë të humbjes.
“Duhet dorëheqje në nivelet më të larta të PD-së dhe në çdo degë. Kemi nevojë për emërime të reja, për komandime që të rikthejnë frymën dhe të rrisin anëtarësinë. Partia nuk mund të ecë përpara me figura që nuk kanë bërë asgjë për ta ngritur atë,” – u shpreh Maliqi.
Ai propozoi që në një fazë të parë të nisë një proces i shpejtë për përzgjedhjen e drejtuesve të rinj në bazë, përmes komandimeve me mandat të kufizuar, që do të shërbejnë si një fazë tranzitore për reformimin e organizatës. Sipas tij, ky proces do të mundësonte edhe rritjen e përfaqësimit të brezit të ri në strukturat vendimmarrëse të PD-së.
Megjithatë, në një kthesë të papritur brenda retorikës kritike, Lefter Maliqi e përjashtoi për momentin mundësinë e largimit të liderit historik të Partisë Demokratike, Sali Berisha. Ai mbrojti figurën e tij duke thënë se Berisha ende ka mbështetjen e një pjese të madhe të anëtarësisë dhe se nuk është ai problemi kryesor i rënies së PD-së, por njerëzit që e rrethojnë.
“Sali Berisha ka besuar tek drejtues të caktuar që nuk ia kanë shpërblyer besimin. Ose kanë qenë inaktivë, ose kanë krijuar përçarje. Ai nuk ka qenë i rrethuar nga njerëz të duhur, dhe kjo ka ndikuar direkt në rezultatin e dobët të partisë,” – tha Maliqi, duke iu referuar qartazi figurave drejtuese të emëruara në strukturat vendore dhe qendrore të PD-së.
Deklaratat e Lefter Maliqit vijnë në një kohë kur brenda Partisë Demokratike po shtohen zërat për ndryshime, analiza të thella dhe reflektim të brendshëm pas një tjetër raundi zgjedhor të pasuksesshëm. Zgjedhjet e 11 majit duket se kanë shërbyer si katalizator për shpërthimin e një debati të ashpër mbi drejtimin e partisë, performancën në terren, mungesën e frymës opozitare dhe shkëputjen nga elektorati tradicional i djathtë.
Nga ana tjetër, pozicioni i Sali Berishës vazhdon të mbetet një pikë kyçe për të ardhmen e PD-së. Ndërsa një pjesë kërkon largimin e tij për t’i hapur rrugë një brezi të ri politik, të tjerë si Lefter Maliqi vazhdojnë ta konsiderojnë atë si “shtyllë të opozitës” dhe kërkojnë që përgjegjësia të bjerë mbi drejtuesit e tjerë, të cilët, sipas tyre, nuk kanë pasur as vizionin dhe as guximin për të ringritur strukturën dhe për t’u përballur seriozisht me mazhorancën.
Në mbyllje të deklaratës, Maliqi nënvizoi se nëse PD nuk bën ndryshime substanciale në një kohë të shpejtë, rrezikon të zhytet akoma më thellë në krizë dhe të humbasë çdo shpresë për të qenë alternativë reale për zgjedhjet e ardhshme.
