Reperi i njohur shqiptar Noizy nuk arriti të ngjitej në skenën e diskotekës Rinora 4 në Zurich mbrëmjen e djeshme, ndonëse koncerti ishte i parashikuar dhe i promovuar më herët.
Burime të sigurta për “Prive” bëjnë të ditur se ai është ndaluar nga autoritetet zvicerane menjëherë pas zbarkimit në aeroport.
Ende nuk janë bërë të ditura arsyet e sakta të ndalimit, megjithatë, problematikat që lidhen me vizat e punës mbeten një çështje e shpeshtë për artistët që performojnë jashtë vendit, sidomos nëse mungojnë njoftimet zyrtare ndaj autoriteteve të vendeve përkatëse.
Për shkak të kësaj ndërhyrjeje nga autoritetet, koncerti është anuluar dhe të gjitha posterët dhe njoftimet e datës 5 korrik janë hequr nga rrjetet sociale të klubit.
Pak para nisjes, Noizy kishte postuar një foto nga avioni, duke paralajmëruar destinacionin e radhës – Zurich. Por që nga ajo kohë, nuk ka pasur asnjë reagim të mëtejshëm nga vetë artisti në rrjetet sociale lidhur me situatën.
