TIRANË — Prokuroria e Posaçme (SPAK) ka zbardhur një ngjarje të rëndë kriminale, rrëmbimin, vrasjen dhe zhdukjen e 21-vjeçarit Klevis Lleshi nga Burreli, krim i kryer në gusht të vitit 2020. Eshtrat e tij u gjetën disa muaj më vonë, në dhjetor të po atij viti, në fshatin Shpërdhet të Kurbinit.
Për këtë rast, SPAK ka lëshuar katër urdhër-arreste, ndërsa deri tani është ekzekutuar vetëm një. Si urdhërues i këtij krimi dyshohet të jetë Aurel Hoxha, pronar i një lokali në Tiranë, ndërsa tre personat e tjerë janë bashkëpunëtorë të tij. Kontrolle policore janë kryer në disa zona të Tiranës, Kamzës dhe Mamurrasit.
Motivi i këtij krimi makabër dyshohet se është hakmarrja për vrasjen e vëllait të Aurel Hoxhës, Agim Hoxha, i cili u ekzekutua dhe më pas u dogj në vitin 2012 në Britaninë e Madhe. Pas vrasjes së Agim Hoxhës, një sagë e gjatë hakmarrjeje ka nisur kundër anëtarëve të familjes Lleshi. Sipas hetimeve, përveç Klevis Lleshit, janë ekzekutuar edhe babai i tij, Xhavit Lleshi, xhaxhai i tij, Hajredin Lleshi, si dhe kushëriri i tij, Arben Lleshi.
Ky i fundit, Arben Lleshi, u ekzekutua brenda burgut të sigurisë së lartë në Peqin nga Sokol Mjacaj në dhjetor 2023. Arben Lleshi ishte dënuar me burgim të përjetshëm si autori i vrasjes së Agim Hoxhës në Britani, krim që mendohet se ndodhi për shkak të prishjes së pazareve të drogës. Me këtë operacion, SPAK po përpiqet të ndalë ciklin e hakmarrjes mes këtyre dy familjeve.