Zëvendëspresidenti i Shteteve të Bashkuara, J.D. Vance, deklaroi se Venezuela ka injoruar oferta të shumta nga SHBA-të për arritjen e një marrëveshjeje.
Sipas tij, Donald Trump i kishte ofruar presidentit venezuelian Nikolas Maduro “disa mënyra për t’u larguar”, por theksoi se “trafikimi i drogës duhet të marrë fund dhe nafta e vjedhur duhet t’i kthehet Shteteve të Bashkuara”.
Këto deklarata Vance i bëri përmes një postimi në rrjetin social X.
“Ju nuk mund t’i shmangeni drejtësisë amerikane për trafik droge vetëm sepse jetoni në një pallat në Karakas”, u shpreh zëvendëspresidenti amerikan, duke nënvizuar qëndrimin e ashpër të Uashingtonit ndaj udhëheqjes venezueliane.
Qeveria e Venezuelës ka dënuar atë që e ka cilësuar si një “agresion shumë të rëndë ushtarak” nga Shtetet e Bashkuara ndaj disa pjesëve të vendit, pas raportimeve për shpërthime në kryeqytetin Caracas dhe në zona të tjera, në orët e para të së shtunës.
Në një deklaratë, qeveria akuzoi SHBA-në për kryerjen e një sulmi ndaj Caracas-it dhe shteteve Miranda, Aragua dhe La Guaira.
Presidenti Nicolás Maduro ka shpallur gjendjen e jashtëzakonshme dhe ka urdhëruar zbatimin e të gjitha planeve kombëtare të mbrojtjes “në kohën dhe rrethanat e duhura,” sipas deklaratës zyrtare të qeverisë.
“Venezuela refuzon, dënon dhe i bën thirrje komunitetit ndërkombëtar për të ndëshkuar agresionin ushtarak jashtëzakonisht serioz të kryer nga Qeveria aktuale e Shteteve të Bashkuara të Amerikës ndaj territorit venezuelian”, thuhet ne deklarate.
Po ashtu, qeveria bëri thirrje që të gjitha forcat shoqërore dhe politike të Venezuelës të mobilizohen për të mbrojtur vendin.
“Populli i Venezuelës dhe Forcat e Armatosura Kombëtare Bolivariane, në një unitet të plotë popull-ushtarak-policor, janë të angazhuara për të garantuar sovranitetin dhe paqen,” theksohet në deklaratë.
Sipas dokumentit, Venezuela do të depozitojë gjithashtu ankesa pranë Këshillit të Sigurimit të OKB-së, Sekretarit të Përgjithshëm të OKB-së dhe institucioneve të tjera ndërkombëtare, duke kërkuar dënimin e veprimeve të SHBA-së.
