Ervin Mata, biznesmeni shqiptar i ndërtimit i përfolur prej vitesh për lidhje me trafikun ndërkombëtar të drogës, është arrestuar pak ditë më parë në ishullin turistik të Ilhabela-s, në Brazil.
Ai ishte shpallur në kërkim nga drejtësia shqiptare dhe akuzohet nga SPAK për përfshirje në disa episode të trafikimit të lëndëve narkotike nga Amerika Latine drejt Europës dhe Shqipërisë, si edhe për lidhje me organizata kriminale.
Sipas raportimeve të mediave braziliane, arrestimi u krye nga Policia Federale braziliane në bashkëpunim me autoritetet lokale në zonën bregdetare të shtetit São Paulo. Lajmi u publikua fillimisht nga CNN Brazil dhe më pas u pasqyrua edhe në mediat shqiptare.
Për vite me radhë, Mata kishte arritur t’i shmangej arrestimit duke lëvizur mes vendeve të Amerikës Latine, Spanjës dhe Brazilit, ndërsa në Shqipëri emri i tij u bë i njohur jo vetëm për investimet në sektorin e ndërtimit, por edhe pas përplasjes së famshme me Ervis Martinaj në ngjarjen e njohur si “Masakra e Bllokut”.
Vendndodhja ku ai u arrestua ka një histori të errët kriminale. Ishulli Ilhabela, sot një destinacion luksoz turistik në brigjet braziliane, përmendet shpesh në historinë e trafikut ndërkombëtar të drogës për shkak të lidhjeve me mafian italiane në vitet ’70.
Aty u vendos për një periudhë edhe Tommaso Buscetta, një prej figurave më të njohura të mafias siciliane, i cili më vonë u bë edhe një nga të penduarit më të famshëm të Cosa Nostra-s. Nën identitet të rremë, ai jetonte në ishull si një biznesmen i zakonshëm, ndërsa dyshohet se drejtonte operacione të trafikut të kokainës dhe heroinës drejt Amerikës së Veriut, duke përdorur porte dhe pista të vogla ajrore në zonë.
Pikërisht në këtë ishull, dekada më vonë, u lokalizua dhe u arrestua edhe Ervin Mata. Ende nuk dihet se përse kishte zgjedhur të jetonte në Ilhabela, nëse për shkak të izolimit dhe luksit që ofron zona, apo për arsye të tjera që lidhen me aktivitetin e tij.
Comments are closed.