Një ngjarje e rëndë ka tronditur Irlandën e Veriut, ku një grua 27-vjeçare, nënë e dy fëmijëve dhe shtatzënë, është gjetur e pajetë në banesën e saj. Policia e ka identifikuar viktimën si Sarah Montgomery.
Raportimet e para nga policia thonë se janë njoftuar për një grua pa ndjenja me plagë serioze në një banesë në zonën Elmfield Walk, të dielën pasdite.
Ekipet mjekësore që mbërritën në vendngjarje tentuan të ofrojnë ndihmë të menjëhershme, por ajo u shpall e vdekur në vend.
Hetimet për këtë ngjarje janë në fazat fillestare dhe dyshohet se mund të bëhet fjalë për një vrasje. Detektivi Tom Phillips deklaroi se familja e Sarah po përballet me një dhimbje të madhe dhe se aktualisht po mbështetet nga oficerë të trajnuar posaçërisht.
Nga ana tjetër, Shefja e Policisë për Rajonin Verior, Yvonne McManus, theksoi se lajmi ka shkaktuar tronditje dhe shqetësim në komunitet, dhe shtoi se prania e policisë në zonë do të vijojë edhe në ditët në vijim.
Ajo theksoi se dhuna ndaj grave dhe vajzave mbetet një shqetësim madhor dhe se autoritetet janë të angazhuara për ta adresuar këtë çështje në mënyrë serioze.
Policia u bën thirrje të gjithë qytetarëve që kanë informacion të kontaktojnë menjëherë autoritetet dhe të ndihmojnë në zbardhjen e kësaj ngjarjeje tragjike.
