Një ngjarje e rëndë është shënuar mbrëmjen e kësaj të mërkure në Golem ku shtetasi 38-vjeçar me ininciale A.B. ka kundërshtuar efektivët e policisë.
Përmes një njoftimi zyrtar, Policia bën me dije se rreth orës 19:10, Patrulla e Përgjithshme e Postës së Policisë Golem, bashkë me Ndihmës specialistin e zonës që ishte i gatshëm, gjatë patrullimit në territor, ka konstatuar 38-vjeçarin i cili kishte shkelur masën e sigurisë “arrest me shtëpi”.
Gjatë ndalimit efektivët i kanë kërkuar arsyen se pse ai kishte vendosur që të thyente këtë masë, duke i komunikuar më tej shoqërimin e tij për në Komisariat. Mirëpo në këtë moment ku shtetas, i ndihmuar nga kunati i tij 23-vjeçar dhe familjarët e tyre kanë kundërshtuar efektivët e policisë.
Si rrjedhojë, bluve u është dashur që të qëllonin në ajër me qëllim zmbrapsjen e tyre. Në ndihmë të këtij grupi kanë shkuar dhe shërbimet e tjera policore të cilët kanë bërë të mundur shoqërimin e shtetasve të përfshirë në këtë ngjarje.
Policia është duke vijuar hetimet për zbardhjen e plotë të saj, ndërkohë që lidhur me rastin është njoftuar edhe Agjencia e Mbikëqyrjes Policore.
Njoftimi i plotë i Policisë:
Kavajë / Informacion paraprak
Rreth orës 19:10, Patrulla e Përgjithshme e Postës së Policisë Golem, bashkë me Ndihmësspecialistin e zonës që ishte i gatshëm, gjatë patrullimit në territor, në Golem, kanë konstatuar në rrugë shtetasin A. B., 38 vjeç, i cili ishte i shoqëruar me persona të tjerë, dhe e kanë ndaluar për verifikim, pasi njihej nga Policia që ishte me masë sigurie “Arrest në shtëpi” për veprën penale “Shkatërrimi i pronës me zjarr”.
Punonjësit e Policisë, gjatë verifikimit, i kanë kërkuar arsyen e thyerjes së masës së sigurisë dhe i kanë komunikuar se do të shoqërohej në ambientet e Komisariatit të Policisë Kavajë për veprime të mëtejshme.
Shtetasi A. B. dhe kunati i tij, shtetasi A. Sh., 23 vjeç, kanë kundërshtuar me forcë shërbimet e Policisë, të ndihmuar edhe nga persona të tjerë, familjarë të tij.
Punonjësi i Policisë me detyrë Ndihmësspecialist në Postën e Policisë Golem ka qëlluar me armën e shërbimit, pistoletë, një herë në ajër, me qëllim zbrapsjen e tyre.
Në ndihmë të punonjësve të Policisë kanë shkuar shërbime të tjera policore, të cilat kanë bërë shoqërimin e shtetasve të përfshirë në kundërshtim të veprimeve të Policisë.
Gjithashtu, është shoqëruar në Komisariat edhe shtetasi A. B., i cili kishte thyer masën e sigurisë.
Veprimet hetimore për këtë rast po kryhen nga Oficeri i Policisë Gjyqësore i Prokurorisë së Juridiksionit të Përgjithshëm Durrës.
Ndërkohë, është njoftuar edhe Agjencia e Mbikëqyrjes Policore për rastin.
Comments are closed.