Një ngjarje e rëndë ka tronditur qytetin Wolverhampton në Angli, pasi një nxënëse 11-vjeçare zbuloi trupin e pajetë të një burri në ambientet e një shkolle të mesme, gjatë zhvillimit të orës së edukimit fizik. Ngjarja ndodhi rnë akademinë Smestow, teksa nxënësit po shkonin drejt fushës së futbollit për aktivitet sportiv. Sipas familjarëve, vajza u përball papritur me trupin e një burri pranë portave të fushës, në kushte mjegulle të dendur, dhe shpërtheu në të bërtitura nga paniku.
Babai i saj ka treguar se vajza telefonoi nënën duke bërtitur dhe duke thënë se kishte gjetur një trup të pajetë. Ai theksoi se vajza ishte thellësisht e tronditur dhe u largua menjëherë nga shkolla. Pas alarmit, shërbimet e emergjencës mbërritën në vendngjarje rreth 40 minuta më vonë. Policia rrethoi zonën dhe ngriti një tendë forenzike, ndërsa drejtuesit e shkollës vendosën mbylljen e menjëhershme të institucionit dhe dërgimin e nxënësve në shtëpi.
Një tjetër prind konfirmoi se edhe nxënës të tjerë kishin qenë dëshmitarë të zbulimit të trupit, ndërsa shkolla ka ofruar mbështetje psikologjike dhe këshillim për fëmijët e prekur nga ngjarja. Në një njoftim zyrtar, drejtuesit e akademisë thanë se trupi ishte gjetur në skajin e territorit të shkollës dhe se policia kërkoi mbylljen e përkohshme për të lehtësuar hetimet. Institucioni do të rihapet normalisht, ndërsa gjatë ditës do të zhvillohen takime me nxënësit për t’i qetësuar dhe informuar.
Policia e West Midlands ka konfirmuar se burri u shpall i vdekur në vendngjarje dhe se po punohet për identifikimin e tij dhe sqarimin e plotë të rrethanave të vdekjes. Deri më tani nuk është bërë e ditur nëse bëhet fjalë për vdekje natyrale apo rrethana të dyshimta.
Comments are closed.