Një ngjarje e rëndë ka ndodhur mëngjesin e së dielës në qytetin Traiskirchen, rreth 32 kilometra në jug të Vjenës, ku një burrë qëlloi për vdekje një person dhe plagosi rëndë një grua, para se të vetëvritej.
Sipas policisë austriake, autori u largua nga vendi i krimit me një automjet dhe më vonë u gjet i pajetë në një vresht, jo larg vendngjarjes. Viktima është një burrë, ndërsa gruaja e plagosur u transportua me helikopter drejt një spitali në Vjenë, ku ndodhet nën kujdesin intensiv të mjekëve.
Sipas zëdhënësit të policisë lokale, Johann Baumschlager, dyshohet se ngjarja u parapri nga një konflikt verbal mes tre personave.
Hetimet po zhvillohen nga Zyra për Hetime Kriminale e Austrisë së Poshtme, ndërkohë që ende nuk janë zbuluar detaje të mëtejshme mbi motivin.
Mediat lokale raportojnë se autori i dyshuar, 67 vjeç, ishte me origjinë austriake dhe ndodhej me leje të përkohshme nga burgu. Ai posedonte armën me të cilën kreu krimin në mënyrë të paligjshme.
