Pakistani ka arrestuar 11 persona të dyshuar, pasi në rrjete sociale u publikua një video ku një grua dhe një burrë qëllohen për vdekje për shkak se ishin martuar në kundërshtim me dëshirën e familjeve të tyre, në atë që quhet vrasje e nderit, thanë autoritetet pakistaneze.
Burri dhe gruaja, të cilët nuk u identifikuan, u qëlluan me armë zjarri nën urdhrat e një këshilli fisnor lokal muajin e kaluar në provincën jugperëndimore të Pakistanit, Baloçistan, sipas autoriteteve provincial, të cilat zhvilluan hetim pasi videoja u bë virale, raporton agjencia e lajmeve “Reuters”.
Kryeministri rajonal, Sarfraz Bugti, tha në një deklaratë të publikuar të hënën se 11 persona janë arrestuar për këtë rast. Ai e dha njoftimin disa orë pasi tregoi se lokacioni dhe personat që shihen në video ishin identifikuar.
Bugti tha se personat e përfshirë do të ndiqen penalisht. Në video shihen disa njerëz dhe disa automjete në një zonë shkretinore.
Gruas që do të ekzekutohej i jepet një kopje e Kuranit dhe pastaj ajo i thotë një burri: “Eja, ec shtatë hapa me mua, pas kësaj mund të më qëllosh.”
Burri pastaj e ndjek gruan disa hapa. Një zyrtar lokal i policisë tha se gruaja nuk kishte qarë e as nuk kishte kërkuar mëshirë.
“Ty të lejohet vetëm që të më qëllosh mua. Asgjë më shumë se kaq” – thotë gruaja në gjuhën rajonale Brahavi, e përkthyer nga zyrtari.
Nuk ishte e qartë se çfarë donte të thoshte ajo me fjalët “asgjë më shumë se kaq”.
Burri, që kishte ecur pas gruas, më pas ia drejton një pistoletë, kur ajo ia kishte kthyer shpinën qitësit.
Gruaja qëndroi në këmbë, kur të shtënat u dëgjuan. Ajo mbeti në këmbë pas dy krismave, të shkrepura nga një largësi e vogël, ndërsa rrëzohet pas krismës së tretë.
Në video më pas dëgjohen disa të shtëna të tjera. Në pamje shihet një burrë i përgjakur i shtrirë në tokë, afër trupit të gruas së vrarë. Më pas, burrat shihen duke shtënë në drejtim të dy trupave.
Agjencia “Reuters” nuk ka mundur ta vërtetojë në mënyrë të pavarur autenticitetin e videos.
Komisoni për të Drejtat e Njeriut në Pakistan tha se vitin e kaluar janë regjistruar të paktën 405 “vrasje nderi”, duke i kritikuar autoritetet se kanë dështuar që t’i çrrënjosin këto raste.
Shumica e viktimave janë gra dhe vrasjet kryhen zakonisht nga të afërmit që pretendojnë se e mbrojnë reputacionin e familjes, thonë grupet për të drejtat e njeriut.
Familjet konservatore në shumë pjesë të Pakistanit dhe Indisë nuk i lejojnë çiftet që të martohen kundër dëshirës së familjarëve.
