Dy zjarrfikës janë vrarë dhe një tjetër është plagosur pas një prite të armatosur që zgjati për orë të tëra, pasi ekipet e ndërhyrjes së shpejtë mbërritën në vendin ku kishte rënë zjarr në Canfield Mountain, pranë qytetit turistik Coeur d’Alene, pasditen e së dielës në SHBA.
Ngjarja tragjike nisi rreth orës 14:00 me orën lokale dhe përfundoi pesë orë më vonë, kur forcat speciale zbuluan trupin e pajetë të një personi.
Identiteti i autorit të dyshuar nuk është bërë ende publik dhe autoritetet nuk kanë specifikuar llojin e armës së përdorur në këtë sulm të përgjakshëm. Urdhrat për qëndrimin në banesë janë hequr tashmë, por policia ka paralajmëruar se zjarri në zonë vijon të jetë aktiv.
Dy viktimat janë pjesëtarë të shërbimit zjarrfikës, konfirmoi Sherifi Bob Norris në një konferencë për shtyp, ndërsa si treti ndodhet ne spital.
Sipas autoriteteve, përplasja me armë shpërtheu rreth 30 minuta pasi zjarrfikësit mbërritën për të shuar një zjarr të vogël por aktiv në zonën malore. Pasi ekipet hynë në terren, mbi ta u hap zjarr nga disa drejtime, nga një ose më shumë autorë të fshehur në pyll.
Përleshja me armë ka qenë e pandërprerë. Gjatë komunikimit me mediat, Sherifi Norris deklaroi se forcat policore po përballeshin me “snajperë aktivë” dhe se nuk ishte e qartë nëse bëhej fjalë për një autor të vetëm apo për disa, por se autoritetet ishin të përgatitura të neutralizonin kërcënimin sa më shpejt të ishte e mundur.