Baki Bala, ish-Prefekt i qarkut të Fierit, është ndarë këtë të shtunë nga jeta pas një beteje të vështirë me një sëmundje të rrallë. Familja ka dhënë lajmin e trishtë, që ka prekur miq e shokë të shumtë të Baki Balës.
Bashkëshortja e tij shpreh dhimbjen e thellë për humbjen e parakohshme të bashkëshortit dhe babait të tre vajzave të tyre, duke theksuar forcën, dinjitetin dhe shpresën me të cilën ai u përball me sëmundjen.
Gjatë jetës dhe veprimtarisë së tij publike, Baki Bala u vlerësua për përkushtimin dhe korrektësinë në shërbim të qytetarëve, sepse la pas një kontribut të çmuar në drejtimin e institucioneve dhe në jetën publike të qarkut Fier.
Baki Bala do të kujtohet gjithmonë si një njeri fisnik, i buzëqeshur, optimist dhe luftëtar i palodhur, i cili la gjurmë të paharrueshme te të afërmit, miqtë dhe bashkëpunëtorët. Në ditët në vazhdim do të bëhen të ditura edhe detajet për ceremoninë mortore.
Njoftimi i familjes për vdekjen e Baki Balës
“Me dhimbje të pamasë po ndajmë lajmin e ndarjes së parakohshme nga jeta të bashkëshortit tim të shtrenjtë dhe babait të tre vajzave tona, Baki Bala.
Ai u përball me një sëmundje të vështirë dhe të rrallë me forcë, dinjitet dhe shpresë, duke na mësuar çdo ditë çfarë do të thotë të luftosh me zemër dhe të duash jetën edhe në momentet më të vështira. Largimi i tij ka lënë një boshllëk të thellë në zemrat tona, një dhimbje që fjalët nuk arrijnë ta përshkruajnë.
Do të jetojë përgjithmonë në kujtimet dhe zemrat tona si një shpirt fisnik, i buzëqeshur, optimist dhe luftëtar i palodhur — ashtu siç ishte gjatë gjithë jetës së tij. Në ditët në vazhdim do t’ju njoftojmë detajet për ceremoninë mortore.”
Baki Bala humb betejën me sëmundjen e rëndë, ndahet nga jeta
Baki Bala, ish-Prefekt i qarkut të Fierit
