Biznesmeni italian Massimo Ferro ka ndërruar jetë në Tiranë pas një ndërhyrjeje kirurgjikale për humbje peshe, një ngjarje që ka tronditur opinionin publik në Itali dhe ka çuar në hapjen e një hetimi penal.
Sipas asaj që media italiane Corriere Della Sera raporton mësohet se Massimo Ferro, 54 vjeç, sipërmarrës nga qyteti Camposampiero, kishte vendosur t’i nënshtrohej një operacioni për zvogëlimin e stomakut, pasi prej vitesh kishte provuar pa sukses dieta të ndryshme për të humbur peshë. Ai iu drejtua një klinike private në Milano, e cila i propozoi ndërhyrjen kirurgjikale jo në Itali, por në Tiranë, në një klinikë të lidhur me atë italiane.
Çmimi i operacionit ishte 4.400 euro, shumë më i ulët krahasuar me rreth 15.000 euro që kërkoheshin në Itali. Kontakti mes Ferros dhe kirurgut u zhvillua përmes mesazheve në ËhatsApp, ku u diskutuan kostot, procedura dhe organizimi i udhëtimit. Më 6 dhjetor 2025, Ferro u paraqit në takim së bashku me djalin e tij të madh, ku iu shpjegua se ndërhyrja do të kryhej me teknikë laparoskopike dhe se procedura ishte e shpejtë dhe e sigurt.
Pavarësisht se pacienti vuante nga diabeti i tipit 2 dhe peshonte 108 kilogramë, operacioni u planifikua për datën 18 dhjetor në Tiranë. Analizat para operacionit, të cilat zakonisht kryhen disa javë përpara, u lanë për t’u realizuar vetëm një ditë para operacionit, pasi Ferro nuk i kishte kryer ato në Itali. Më 17 dhjetor, ai mbërriti në Tiranë së bashku me bashkëshorten e tij.
Sipas ankesës së familjes, nuk u respektuan procedurat e parashikuara nga udhëzimet italiane dhe ndërkombëtare për kirurgjinë e obezitetit. Nuk u zhvillua asnjë program paraprak dietik apo përgatitor, nuk pati vlerësim multidisiplinor dhe nuk u krye përgatitje specifike para ndërhyrjes. Udhëzimi i vetëm i dhënë ishte që të qëndronte pa ushqim një ditë para se të kryente operacionin.
Ashtu si dhe ishte planifikuar, operacioni i krye më 18 dhjetor dhe menjëherë pas ndërhyrjes, Massimo Ferro kontaktoi familjen për t’i siguruar se gjithçka kishte shkuar mirë. Megjithatë, që nga dita pasuese, gjendja e tij shëndetësore nisi të përkeqësohej. Ai u bë gjithnjë e më i përgjumur, reagimi i tij ishte i dobët dhe niveli i sheqerit në gjak mbeti i lartë. Më 20 dhjetor, ai shfaqi temperaturë 38 gradë Celsius dhe u trajtua vetëm me paracetamol.
Më 21 dhjetor, temperatura i u rrit në 39 gradë dhe ai filloi të kishte vështirësi serioze në frymëmarrje. Për këtë arsye u dërgua me urgjencë në spitalin publik “Nënë Tereza” në Tiranë, ku iu kryen disa analiza. Sipas familjes, antibiotiku iu dha vetëm në mbrëmje, përpara se të rikthehej sërish në klinikën private. Gjatë natës, gjendja e tij u përkeqësua ndjeshëm.
Në mëngjesin e 22 dhjetorit, Massimo Ferro pësoi një arrest kardiak në klinikë. Ai u ringjall dhe u transportua me ambulancë në repartin e kujdesit intensiv të spitalit publik. Fillimisht u njoftua se gjendja ishte stabilizuar, por në mbrëmje bashkëshortja e tij mori një telefonatë urgjente. Kur mbërriti në spital, Massimo Ferro kishte ndërruar jetë prej disa orësh.
Prokuroria e Padovës ka hapur një hetim lidhur me këtë ngjarje dhe ka vënë nën hetim kirurgun Andrea Formiga dhe dietologen Alessandra Freda, të dy nga Lombardia. Një autopsi pritet të kryhet në Padova për të përcaktuar shkaqet e sakta të vdekjes.
Familja e tij shprehet se deri më tani askush nuk ka dhënë një përgjigje të qartë për atë që ndodhi. “Ne vetëm duam të dimë pse Massimo nuk u kthye më në shtëpi”, kanë deklaruar bashkëshortja Romina dhe fëmijët e tij.
Comments are closed.