Deputeti i Partisë Socialiste, Erion Braçe ka marrë pjesë në homazhet për Fatos Nanon. I pa shoqëruar nga asnjë prej figurave politike të Partisë Socialiste, Braçe i ka dhënë lamtumirën e fundit ish-kryeministrit dhe ka nderuar kontributin e tij në historinë politike të Shqipërisë.
Para arkëmortit të Nanos, Braçe ka shpërthyer në lot. Pas homazheve, ai ka takuar bashkëshorten e tij Xhoana Nano dhe familjarët, dhe më pas është ulur për të shkruar një mesazh ngushëllimi në Libri i Kujtimeve, ku ka shprehur mbresat dhe respektin e tij të veçantë.
Shkurtimisht për mediat, ai ka pohuar se Nano ka qenë një figurë me peshë dhe respekt në politikën shqiptare, një lider që ka lënë gjurmë të thella dhe ka shërbyer si model për shumë breza të mëvonshëm. Sipas deputetit socialist ai i dha mundësi të gjithëve që të përmirësoheshin.
“Unë besoj që pjesëmarrja e kaq shumë njerëzve për ta përcjellë Fatos Nanon sot është ajo që duhet të vendosni në evidencë. Është një masë shumë e madhe njerëzish që duan ti japin lamtumirën.
Janë njerëz që u ritën me PS dhe me të dhe natyrisht besoj unë që shprehja e mirënjohjes sot është gjëja e duhur që duhet bërë. Fatos Nano i dha mundësi të gjithëve, pa përjashtim. Edhe atyre që ishin në rrënojat e partisë së punës dhe dolën prej saj. I dha mundësi të gjithëve. Ju dha lirinë që të bëheshin njerëz më të mirë dhe të bënin një parti më të mirë nga ajo që trashëguan”, tha ai.