TIRANË – Vetëm pak orë pasi Kryeministri Edi Rama e cilësoi ftesën për t’u bërë pjesë e “Bordit të Paqes” si një “majë të paimagjinueshme” dhe vlerësim personal nga Presidenti Donald Trump, një dokument zyrtar nga Uashingtoni duket se ka shfryrë të gjithë narrativën e suksesit ndërkombëtar.
Sipas njoftimit zyrtar të Shtëpisë së Bardhë për planin gjithëpërfshirës për përfundimin e konfliktit në Gazë, emri i Edi Ramës nuk figuron në asnjë prej dy strukturave kryesore që do të kenë në dorë fatet e projektit: Bordin Qendror dhe Bordin Ekzekutiv.
Kupola e Trump pa Edi Ramën
Në listën e publikuar nga SHBA, “tavolina e madhe” ku do të merren vendimet ekzekutive dhe financiare përbëhet nga emra si Marco Rubio, Jared Kushner dhe drejtues të lartë të institucioneve financiare. Ndryshe nga pretendimi i Ramës për të punuar “së bashku” me Trump në këtë bord, dokumenti tregon se roli i Shqipërisë, në rastin më të mirë, mbetet periferik ose thjesht këshillues, pa asnjë peshë vendimmarrëse.
Hasani: “Rama doli pa brekë, është thjesht asistent i Tony Blair”
Gazetari Habjon Hasani ka reaguar ashpër pas publikimit të njoftimit zyrtar, duke e akuzuar Kryeministrin për manipulim të opinionit publik. Sipas Hasanit, përfshirja e mundshme e Ramës në ndonjë strukturë dytësore është thjesht një “qokë” apo nder që i është bërë përmes ish-kryeministrit britanik Tony Blair.
“Edi Rama mund të jetë në ndonje bord këshillues si anëtar, ose dhe në bordin e ujësjellësave për Gazën; por nuk rezulton fare në dy bordet kryesore në kupolën e ndërtuar nga Trump. Njoftimi i Shtëpisë së Bardhë të nxjerr pa brekë o shoku Rrapi,” shkruan Hasani në reagimin e tij.
Një rol “Null” në vendimmarrjen globale
Analiza e njoftimit zyrtar sugjeron se roli i Kryeministrit shqiptar në këtë projekt është praktikisht “null”. Ndërkohë që Tirana zyrtare u përpoq ta shiste këtë si një arritje gjeopolitike ku Rama ulet si i barabartë me liderët botërorë, faktet nga Shtëpia e Bardhë tregojnë se ai nuk është pjesë e “berthamës” që do të administrojë miliardat e rindërtimit dhe sigurinë në Lindjen e Mesme.
Ky zhvillim hedh hije dyshimi mbi vërtetësinë e deklaratave të Ramës dhe tregon se “ftesa personale” mund të jetë një tjetër operacion imazhi, i cili u rrëzua sapo doli dokumenti zyrtar i administratës Trump.
