Gjendet në Tiranë 14-vjeçarja e zhd&kur në Durrës, tezja tregon detaje

Është gjetur në Tiranë 14-vjeçarja nga Durrësi, e cila ishte larguar nga banesa e saj pa dijeninë e familjes në orët e para të mëngjesit.

E mitura, nxënëse e shkollës “Qemal Mici”, ishte larguar rreth orës 06:40. Sipas nënës, vajza kishte qenë në shtëpi deri rreth orës 05:00, kur ajo ishte zgjuar për syfyr, dhe më pas ishte rikthyer në gjumë. Kur u zgjua sërish rreth orës 06:30, konstatoi se vajza nuk ndodhej më në dhomën e saj.

Pas kërkimeve, 14-vjeçarja u lokalizua në Tiranë dhe fatmirësisht ndodhet në gjendje të mirë shëndetësore, jashtë çdo rreziku.

Në një reagim për emisionin “Me Zemër të Hapur”, tezja e saj bëri të ditur se vajza tashmë është kthyer në banesë dhe se nuk ka pasur probleme të dukshme në familje apo në ambientin shoqëror.

“Vajza është shumë mirë. Ishte në polici dhe tani ndodhet në shtëpi. Marrëdhëniet me prindërit i ka shumë të mira. Nuk e dimë pse iku, por është në gjendje të mirë. Nuk e kërcënonte apo bullizonte askush”, u shpreh ajo.

Rrethanat e largimit të së miturës mbeten ende të paqarta, ndërsa pritet që autoritetet të hedhin më shumë dritë mbi këtë rast.