Autoritetet gjermane kanë paralajmëruar për mundësinë e veprimeve hakmarrëse iraniane në territorin evropian pas raportimeve për vdekjen e liderit suprem të Iranit, Ali Khamenei.
Kreu i komisionit parlamentar për mbikëqyrjen e shërbimeve sekrete në Gjermani, Marc Henrichmann, deklaroi se nuk mund të përjashtohen akte hakmarrjeje, përfshirë edhe veprime të mundshme nga qeliza të fshehta iraniane që operojnë në Evropë.
“Regjimi iranian ka dëshmuar vazhdimisht në të kaluarën se ushtron terror përtej kufijve të tij”, tha Henrichmann për gazetën Sueddeutsche Zeitung, duke theksuar se masat e sigurisë duhet të rishikohen dhe forcohen nëse situata e kërkon.
Në të njëjtën linjë, i dërguari i qeverisë gjermane për luftën kundër antisemitizmit, Felix Klein, paralajmëroi për rrezik të shtuar ndaj objektivave hebraike dhe izraelite në Gjermani.
“Është e pritshme që Irani të përdorë rrjetet e tij në këtë vend për të kryer sulme terroriste kundër qendrave hebraike dhe izraelite”, deklaroi Klein për grupin mediatik Funke Mediengruppe.
Precedenti shqiptar
Paralajmërimet gjermane rikthejnë në vëmendje precedentët e tensioneve të Iranit me vende evropiane, përfshirë Shqipërinë.
Në vitin 2020, Udhëheqësi Suprem Ali Khamenei e cilësoi Shqipërinë si “një vend të vogël, por djallëzor”, duke e akuzuar për bashkëpunim me opozitën iraniane (MEK), e cila është strehuar në territorin shqiptar.
Më vonë, në vitin 2022, Shqipëria ndërpreu marrëdhëniet diplomatike me Iranin pas një serie sulmesh kibernetike ndaj sistemeve qeveritare shqiptare, përfshirë portalin e-Albania. Autoritetet shqiptare fajësuan drejtpërdrejt Republikën Islamike për sulmet, duke dëbuar diplomatët iranianë nga Tirana.
Këto zhvillime e vendosën Shqipërinë në qendër të tensioneve mes Iranit dhe Perëndimit, duke e bërë vendin një nga shembujt më të drejtpërdrejtë të përplasjeve hibride të Teheranit në Evropë.
Situatë e tensionuar në kontinent
Autoritetet gjermane theksojnë se aktualisht po monitorojnë nga afër zhvillimet e fundit, ndërsa niveli i kërcënimit në Evropë vlerësohet si i rritur pas përshkallëzimit të konfliktit në Lindjen e Mesme.
Ekspertët e sigurisë paralajmërojnë se përveç sulmeve të drejtpërdrejta, ekziston rreziku i veprimeve hibride, përfshirë sabotime, sulme kibernetike apo aktivizim të rrjeteve të fshehta në territorin evropian.
Comments are closed.