Arrestohet “truri” i basteve të lokaleve 333 dhe CR7, Lendi Palaj
Pas një sërë denoncimesh publike nga media e gazetarë, policia duket se më në fund është zgjuar nga gjumi letargjik dhe ka vepruar ndaj figurës kryesore të basteve sportive në kryeqytet, Njulend Palaj apo siç njihet tanimë Lendi.
Palaj u arrestua bashkë me disa persona të tjerë teksa vendoste baste nëpërmjet telefonit celular një aktivitet i ndaluar me ligj në Shqipëri. Sipas njoftimit zyrtar të policisë së Tiranës, ai u kap në flagrancë në një lokal të përshtatur posaçërisht për lojëra fati, ku klientët kryenin baste online.
Prej kohësh i konsideruar si “truri” i lokaleve 333 dhe CR7, Palaj ka vepruar në hije, duke shmangur shpeshherë vëmendjen e kronikave mediatike. Megjithatë, lidhjet e tij të ngushta politike kanë qenë të njohura gjatë fushatës elektorale të vitit 2021, ai u aktivizua në zonën e Ali Demit në favor të PSD-së së Tom Doshit, duke ndërtuar aty rrjetin e kontakteve që më pas i përdori për aktivitetin e basteve.
Lokalet e lidhura me Palajn nuk mbajnë logo apo tabela të basteve, por funksionojnë në mënyrë të koduar vetëm ata që kanë “kontaktet e duhura” mund të përfshihen në sistem.
Emri i tij nuk është i panjohur për publikun, më 10 qershor, Palaj u përfshi në një sherr të dhunshëm ku dhe u arrestua por jo për shumë gjatë, ndërsa më herët dyshohet se ka qenë edhe shënjestër e një sulmi pranë zyrave të PSD-së gjatë fushatës elektorale. JOQ