Autoritetet shqiptare kanë rritur ndjeshëm nivelin e gatishmërisë në të gjithë vendin, pas alarmit të ngritur një ditë më parë nga Ambasada Amerikane në Tiranë se Shqipëria mund të jetë e rrezikuar nga grupe të lidhura me Iranin.
Burime për mediat bëjnë me dije se Njësia e Antiterrorit në Policinë e Shtetit ka shtuar prezencën pranë institucioneve diplomatike, ndërsa masa të forta sigurie janë marrë edhe në Aeroportin e Rinasit dhe në të gjitha pikat kufitare të vendit.
Paralelisht, në bashkëpunim me Shërbimin Informativ Shtetëror, po kryhen verifikime dhe mbledhje informacioni për individë që mund të paraqesin rrezik apo të kenë prirje për akte të dhunshme dhe qëllime terroriste. Fokus i veçantë i është kushtuar identifikimit të çdo elementi të mundshëm që mund të cenojë sigurinë publike.
Ky reagim i autoriteteve shqiptare vjen pas paralajmërimit të Ambasadës së Shteteve të Bashkuara, e cila sinjalizoi se subjekte të lidhura me interesat amerikane, si dhe elementë të opozitës iraniane në Shqipëri, mund të jenë objektiv i mundshëm sulmesh. Sipas vlerësimeve, rreziku nuk përjashton as hapësira publike të frekuentuara si zona turistike, qendra tregtare, hotele, restorante dhe ambiente argëtimi.
Në një reagim të mëvonshëm, Ambasada Amerikane theksoi se siguria e qytetarëve të saj mbetet prioritet, ndërsa konfirmoi bashkëpunimin e ngushtë me autoritetet shqiptare për të vlerësuar situatën dhe për të parandaluar çdo rrezik të mundshëm. Vlerësim pozitiv iu bë angazhimit të institucioneve shqiptare në garantimin e sigurisë për të gjithë qytetarët dhe vizitorët në vend.
“Administrata Trump nuk ka përparësi më të lartë se siguria dhe mbrojtja e amerikanëve. Ne po bashkëpunojmë ngushtë me autoritetet shqiptare për të vlerësuar situatën dhe për të zbutur rreziqet e sigurisë. Ambasada e Shteteve të Bashkuara vlerëson bashkëpunimin e saj të ngushtë në çështjet e sigurisë me Qeverinë e Shqipërisë, e cila ka shfaqur një angazhim të vazhdueshëm për të garantuar sigurinë e qytetarëve amerikanë dhe të gjithë banorëve të Shqipërisë. Ne do të ofrojmë më shumë informacion sapo të jetë i disponueshëm”, thuhet në reagimin e Ambasadës.
Nga ana tjetër, ditën e sotme në seancën plenare kreu i Grupit Parlamentar të Partisë Socialiste, Taulant Balla bëri të ditur se institucionet shqiptare janë në kontakt të vazhdueshëm me strukturat e sigurisë së Ambasadës Amerikane dhe se bashkëpunimi mes palëve vijon në funksion të menaxhimit të situatës.
Comments are closed.