Policia ka dhënë detaje lidhur me atentatin në Lezhë, ku i plagosur mbeti 30-vjeçari Sokol Daci.
Policia ka zbardhur atentatin e ndodhur mbrëmjen e djeshme në Rrilë të Lezhës, ku mbeti i plagosur me armë zjarri 30-vjeçari Sokol Daci, pronari i berberhanes.
Burime bëjnë me dije se autorët janë: Gerardo Ndoka, Eliseo Ndoka dhe Kevin Ndoka.
Sipas policisë, mësohet se janë identifikuar autorët e dyshuar të ngjarjes dhe janë shpallur në kërkim. Të dyshuarit për përfshirje në atentat janë shtetasit me iniciale G. N., E. N., K. N. dhe M. N. Ndaj tyre, rëndojnë akuzat për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit dhe municionit dhe lëndëve shpërthyese”.
Gjithashtu u ekzekutua urdhri i ndalimit i lëshuar nga Prokuroria për efektivin Besart Kovaçi, 24 vjeç, banues në fshatin Dragushë, i dyshuar për veprën penale “Shpërdorimi i detyrës”.
Pas ndalimit të efektivit të Policisë, Besart Kovaçi, i cili ishte në berberhanën ku ndodhi ngjarja dhe qëlloi me armë zjarri në momentin e atentatit, është zbuluar se nga pistoleta e tij janë qëlluar 10 plumba dhe jo 4 siç u pretendua më herët.
Këto të dhëna kanë dalë pasi është mësuar se në armën e shërbimit të Kovaçit kishte 15 plumba dhe pas të shtënave, kishin mbetur vetëm 5 plumba. Ndërkohë, brenda berberhanes janë gjetur 16 gëzhoja pistolete, 10 të policit dhe 6 gëzhoja të një arme të dytë, armë e cila nuk është gjetur. Një nga 3 personat brenda, përveç policit, dyshohet po ashtu të ketë qëlluar me këtë pistoletë.
Dyshohet se shënjestra kryesore e sulmit ishte 21-vjeçari Merando Nikulaj. Ai është nipi i Ardian Nikulajt dhe sipas burimeve hetimore, pas ngjarjes rezulton i zhdukur. Dyshohet se i riu ndodhej brenda berberhanes në momentin e atentatit dhe është larguar menjëherë pas të shtënave, ndërsa policia është vënë në kërkim të tij.
“Vijojnë veprimet e thelluara hetimore për zbardhjen dhe dokumentimin e plotë ligjor të ngjarjes së ndodhur në Rrilë.
Në lidhje me ngjarjen e ndodhur më datë 01.02.2026, rreth orës 21:00, në fshatin Rrilë, Njësia Administrative Shënkoll, bashkia Lezhë, ku mbeti i plagosur me armë zjarri një shtetas, Grupi i Posaçëm Hetimor i DVP Lezhë, nën drejtimin e Prokurorisë, ka vijuar intensivisht hetimet me qëllim zbardhjen e ngjarjes, dokumentimin ligjor, identifikimin dhe kapjen e autorëve.
Në vijim të veprimeve u ekzekutua urdhri i ndalimit, i lëshuar nga Prokurori, për shtetasin B. K., 24 vjeç, banues në fshatin Dragushë, Njësia Administrative Dajç, Bashkia Lezhë, i dyshuar për veprën penale “Shpërdorimi i detyrës”.
Nga tërësia e veprimeve hetimore e procedurale, ka rezultuar se si të dyshuar në këtë ngjarje janë përfshirë shtetasit G. N., E. N., K. N. dhe M. N., të cilët janë shpallur në kërkim.
Grupi i posaçëm hetimor, nën drejtimin e Prokurorisë Lezhë, vijon punën për dokumentimin e plotë ligjor të ngjarjes. Për shkak të hetimeve, nuk jepen të dhëna të tjera. Vijon puna për lokalizimin dhe kapjen e personave të shpallur në kërkim.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Lezhë, në ngarkim të shtetasve G. N., E. N., K. N. dhe M. N., të dyshuar për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit dhe municionit dhe lëndëve shpërthyese”, si dhe në ngarkim të shtetasit B. K., i dyshuar për veprën penale “Shpërdorimi i detyrës”, njoftoi policia.
Ngjarja ndodhi në ambientet e berberhanes në pronësi të 30-vjeçarit Sokol Daci, i njohur në zonë si “Berber Coli”. Autorët mbërritën me dy automjete, një Audi dhe një Volkswagen Passat. Nga pamjet e kamerave të sigurisë rezulton se në atentat u përfshinë shtatë persona. Dy prej tyre zbritën nga makinat dhe qëlluan me breshëri arme automatike drejt lokalit.
Si pasojë, Sokol Daci, pronar i berberhanes u plagos me tre plumba në shpatull, bark dhe këmbë. Ai u transportua drejt Spitalit të Traumës dhe ndodhet jashtë rrezikut për jetën. Daci nuk rezulton person me precedentë penalë dhe njihet në komunitet si një qytetar pa probleme.
Policia ka intensifikuar kontrollet në spitale dhe klinika private në Lezhë dhe zonat përreth, pasi dyshohet se edhe shënjestra e atentatit mund të ketë marrë plagë dhe të ketë kërkuar ndihmë mjekësore në mënyrë të fshehtë.
Comments are closed.