Ditën e djeshme u bë ekstradimi nga Dubai i të “fortit” të Niklës Durim Bami. Në lidhje me ekstradimin e këtij të fundit, gazetarja Anduena Llabani, ka deklaruar se kryeministri Edi Rama qëndron pas tij.
Gazetarja tha se Rama e ka kërkuar personalisht ekstradimin e Bamit, për të goditur ish-aleatin e tij, Ilir Meta, i cili prej më shumë se viti ndodhet në burg. Ky i fundit, sipas saj, mund të ketë bashkëpunuar me Bamin për eliminime të personave me imunitet.
“Dje u ekstradua Durim Bami në Shqipëri nga Emiratet e Bashkuara Arabe. Kam informacion se Edi Rama ka kërkuar personalisht këtë ekstradim. Ka pasur deklarata nën brez kur Meta ishte jashtë se Meta dhe Bami mund të kenë bashkëpunuar në eliminime të personave me imunitet. Këto informacione kanë qarkulluar në qershor 2024, kur nisën përpjekjet për ekstradim. Rama po e përdor ekstradimin e Bamit për të goditur zotin Ilir Meta. Kanë qenë në bashkëqeverisje”, deklaroi ajo.
Më tej ajo shtoi se ish-presidenti i Republikës është ndër të vetmi që mund të quhet si një faktor kundër kryeministrit.
“Duket se kemi një faktor të fortë kundër kryeministrit. Është Ilir Meta. Për herë të parë e dëgjuam dje që pas një viti e ca në paraburgim, ish-zyrtarë kanë thënë se kryeministri Edi Rama është pas akuzave të ngritura ndaj nesh dhe se ka firmosur dokumentacione në lidhje me to. Kjo nuk ka ndodhur më parë”, u shpreh ajo.
Kujtojmë që ditën e sotme, Durim Bami, i njohur si “i forti i Niklës”, ka kërkuar transferimin e menjëhershëm nga burgu “313” në një tjetër burg, me arsyetimin se ndodhet në rrezik për jetën.
Menjëherë pas akomodimit në IEVP 313, përmes avokatit të tij, Bami i është drejtuar Drejtorisë së Përgjithshme të Burgjeve me një kërkesë zyrtare për transferim në një tjetër institucion paraburgimi.
Në kërkesë argumentohet se në ambientet e paraburgimit aktual ndodhen persona që ai i konsideron kundërshtarë, çka sipas tij përbën “rrezik real, serioz dhe aktual për jetën dhe integritetin fizik”. Mbrojtja thekson se administrata penitenciare ka detyrimin ligjor të garantojë sigurinë e çdo personi të privuar nga liria.
Comments are closed.