Partia Demokratike ka zhvilluar zgjedhjet për drejtimin e disa degëve në vend, ku janë shpallur fituesit në Vlorë dhe Pogradec.
Në Vlorë, fituese u shpall Nada Meçorapaj, e cila arriti të marrë 496 vota, duke lënë pas rivalen e saj Darling Banushi, që siguroi 106 vota. Sipas rezultateve të numërimit, 13 vota rezultuan të pavlefshme.
Meçorapaj është një figurë e njohur në strukturat e Partisë Demokratike në këtë qytet. Ajo ka shërbyer më parë si deputete dhe gjithashtu ka mbajtur detyrën e sekretares së degës së PD-së në Vlorë.
Ndërkohë, në Pogradec, gara për kreun e degës rezultoi më e ngushtë. Oligert Muçllari u shpall fitues me 247 vota, ndërsa kundërkandidati i tij Kasëm Galla mori 224 vota. Në këtë proces u regjistruan edhe 6 vota të pavlefshme.
Muçllari është ekonomist me profesion dhe deri tani ka mbajtur detyrën e drejtuesit të komanduar të degës së PD-së në Pogradec, pas zhvillimit të primareve. Kjo ishte hera e parë që ai kandidonte për postin e kryetarit të degës.
Procesi i zgjedhjeve në këto dy degë është pjesë e riorganizimit të strukturave të Partisë Demokratike në nivel lokal.
Comments are closed.