Trembëdhjetë emigrantë të ngrirë që po shkonin drejt Mbretërisë së Bashkuar janë shpëtuar në Francën veriore, pasi u mbyllën brenda një kamioni frigoriferik që po udhëtonte për në Londër .
Ngjarja ndodhi të shtunën paradite në zonën e pushimit Saint-Hilaire-Cottes, përgjatë autostradës A26, rreth 75 kilometra nga Calais. Emigrantët nga Eritrea, shumica prej tyre të mitur, sipas autoriteteve, hapën me forcë derën e pasme të kamionit ndërsa shoferi flinte, dhe u futën brenda për t’u fshehur.
Kamioni po transportonte domate qershi nga Maroku drejt Londrës, dhe shoferi kishte ndaluar për të pushuar pas një udhëtimi të gjatë. Temperaturat brenda rimorkios frigoriferike arritën në 8°C, duke rrezikuar jetën e emigrantëve.
Rreth orës 13:00, një shofer tjetër kamioni dëgjoi zhurma dhe trokitje që vinin nga brenda dhe njoftoi menjëherë shërbimet e emergjencës. Ekipe urgjence, zjarrfikës dhe xhandarë mbërritën në vendngjarje dhe evakuuan personat në një spital fushor të ngritur përkohësisht në zonën e shërbimit.
Katër prej tyre, përfshirë një vajzë të mitur, u transportuan më pas me urgjencë në spitalet e Arras dhe Saint-Omer, duke shfaqur shenja hipotermie dhe probleme të tjera shëndetësore. Të rriturit u morën në pyetje nga policia, ndërsa të miturit u vendosën në kujdesin e shërbimeve sociale franceze dhe një organizate humanitare për mbrojtjen e të miturve migrantë.
Ky rast sjell në kujtesë tragjeditë e mëparshme me emigrantë të fshehur në kamionë frigoriferikë. Në 2019, 39 vietnamezë u gjetën të vdekur në një kamion në Essex dhe në 2000, 58 kinezë humbën jetën në një kamion holandez në Dover.
Pavarësisht masave të rrepta dhe përdorimit të varkave të vogla për të kaluar Kanalin Anglez, kamionët mbeten ende një mjet i përdorur nga rrjetet e kontrabandës së njerëzve, shpesh me pasoja fatale.
Autoritetet franceze po hetojnë rastin dhe kanë nisur masa për sigurimin e zonës së pushimit, ndërsa organizatat humanitare paralajmërojnë për gjendjen e rëndë të emigrantëve në veri të Francës, pas shkatërrimit të kampeve të improvizuara.