Arrestimi i kryebashkiakut Erion Veliaj ka rindezur pyetjet mbi përplasjet e brendshme në Partinë Socialiste dhe përgatitjen e një pasardhësi për Edi Ramën. Prej vitesh shihej si njeriu më i afërt i kryeministrit dhe një kandidat i mundshëm për drejtimin e partisë, por zhvillimet e fundit tregojnë se Veliaj është nxjerrë jashtë loje. Konspiracionisti Alfred Cako ka hedhur dritë mbi skenarë që sipas tij ndihmuan në rrëzimin politik të Veliajt dhe përgatitjen në heshtje të një emri të ri për të marrë drejtimin e Partisë Socialiste. Deklarata e tij përfshin një analizë të rolit të aktorëve të jashtëm dhe të brendshëm, marrëdhëniet e tensionuara mes Ramës dhe Veliajt, si dhe kalkulimet që kanë çuar në largimin e këtij të fundit nga skena politike.
Prapaskenat
Në fjalën e tij, Alfred Cako është shprehur se Erion Veliaj kishte mbështetje nga Deep State. “Deep State (strukturë e fshehtë e fuqishme brenda shtetit, që vepron në prapaskenë dhe ndikon në vendimmarrje përtej qeverive të zgjedhura) nuk ka hatërmbetje me Erion Veliajn. Ai ka qenë një nxënës shembullor, i ka zbatuar detyrat e tyre edhe më mirë se Rama. Madje, arriti deri aty sa tha gjëra që, me sa di unë, nuk i ka thënë asnjë lider botëror. Gjatë kohës së Covid-it, deklaroi dy herë: ‘Nëse nuk do vijë Muhameti te mali, do vijë mali te Muhameti. Ne do t’ju sjellim vaksinatorin shtëpi më shtëpi dhe do t’ua bëjmë me detyrim.
’Këtë gjë nuk e ka thënë askush tjetër, përveçse OBSH-së. Ata nuk e harrojnë këtë fjalë që ka thënë, pasi ishte një guxim i madh të bëje një gjë të tillë.” Megjithatë, sipas tij, problemi qëndron tjetërkund. “Por problemi është se, midis dy monedhave të çmuara që kanë ata në Shqipëri – të diamantit, që është Edi Rama, dhe të floririt, që është Erion Veliaj – për shkak se këta të dy u grindën, ata u detyruan të marrin një vendim. Sepse Edi Rama mund t’i ketë vënë përballë një pyetje të prerë: ‘O mua, o atë, zgjidhni!’ Dhe ata kanë vendosur: bëj çfarë të duash, godite,” tha ai. Cako flet për një vendimmarrje të qëllimshme për të eliminuar Veliajn nga skena e trashëgimisë, pas prishjes së raporteve me Ramën dhe pas pozicionimit të tij të diskutueshëm në sytë e faktorëve vendimmarrës ndërkombëtarë.
Një përjashtim i paracaktuar
Sipas Alfred Cakos, përjashtimi i Veliajt nuk ka të bëjë vetëm me raportet e tensionuara me Edi Ramën, por edhe me përkatësinë fetare dhe balancat e brendshme të kontrollit në PS. “Është edhe një gjë tjetër, drejtpërdrejt e lidhur me Edi Ramën. Kisha Greke dhe Asfalia bëjnë përpjekje të forta që Partinë Socialiste ta kontrollojnë ortodoksët. Ata nuk mund të lejonin që një mysliman, si Erion Veliaj, të merrte Partinë Socialiste. Ta garantoj unë që pasardhësi i Edi Ramës do të jetë përsëri një ortodoks, sepse grekët nuk e lejojnë që Partia Socialiste të bjerë në kontrollin e myslimanëve. Kjo mund të jetë një nga arsyet”, u shpreh Cako.
Pasardhësi
Pyetja që lind është: kush është ky pasardhës i përzgjedhur në heshtje për të marrë vendin e Edi Ramës? Alfred Cako nuk përmend emra konkretë, por lë të kuptohet se bëhet fjalë për një figurë që i përshtatet më shumë kërkesave të aktorëve ndërkombëtarë dhe është më e balancuar në raport me interesat rajonale dhe fetare. Për momentin, Partia Socialiste nuk e ka bërë të qartë ndonjë plan për pasuesin e Edi Ramës, por lëvizjet e brendshme, heshtja për Veliajn, si dhe ngritja e figurave të reja teknike apo të afërta me Ramën, mund të jenë sinjale për një ndryshim të programuar.
Rama në takimet së fundmi me socialistët ka folur për një kryeministre grua në vitin 2030. “Më vjen shumë mirë që ta ndaj me ju faktin që e kemi hapur trasenë për të ndërtuar dy apo tre aleanca shumë të mëdha strategjike që do ta shndërrojë, mbajeni mend këtë fjalë dhe në 2030 me ndihmën e zotit do të shihemi përsëri se do të vijojmë të mbështesim kryeministren grua. Do shikohemi përsëri në 2030”, tha Rama. SOT.COM.AL