Të tjera pamje kanë dalë nga ngjarja skandaloze e regjistruar një ditë më parë në qytetin e Vlorës, ku efektivët e Rrugores tërhoqën zvarrë një qytetar para syve të vajzës së tij të mitur.
Në videon e publikuar, e vogla dëgjohet duke shpërthyer në të qara, teksa thërret me dëshpërim babain e saj.
“Ju lutem, ju lutem… o babi!”, dëgjohet të thotë ajo, ndërsa policët përpiqen ta nxjerrin me forcë të atin nga automjeti.
Britmat e saj dëgjohen qartë përgjatë gjithë videos, ndërkohë që asnjë nga efektivët nuk ka ndërhyrë për ta qetësuar situatën apo për t’u kujdesur për fëmijën.
Kanë qenë qytetarët e rastit ata të cilët ishin dëshmitarë të kësaj ngjarje ata të cilët ndërhynë dhe kërkuan që fëmija të mos lihej vetëm.
Pamjet kanë tronditur opinionin publik dhe kanë hapur debate serioze mbi mënyrën e sjelljes nga ana e forcave të policisë, veçanërisht në situata të tilla ku janë të pranishëm të mitur.
Mungesa e kujdesit të menjëhershëm ndaj fëmijës ka shkaktuar indinjatë të gjerë, duke u konsideruar si një shkelje e rëndë e të drejtave dhe sigurisë së saj. Deri tani nuk ka një reagim zyrtar nga Policia e Vlorës, ndërsa priten më shumë detaje në vijim.
