Moderatorja Egla solli në vëmendje mënyra kreative që shumë shqiptarë përdorin për të shijuar pushimet, edhe me buxhet të kufizuar:
Egla: “Shumë shqiptarë zgjedhin të bëjnë një fundjavë pushimi, ndoshta me një tendë apo duke u sistemuar në kushte modeste, vetëm për të ndjerë atmosferën e detit.”
Por komentin e saj nuk e mirëpriti Gerta, e cila e konsideroi kampingun si një zgjidhje që i përket vetëm shtresave të varfra.
Gerta: “Çadra është për të varfrit! Kjo është për studentët. Një familje e mirëfilltë nuk mund të shkojë të flejë në tendë. Pushimi është kënaqësi, jo stres.”
Në mbrojtje të kampingut u hodh Kleoniki, e cila solli përvojën e saj personale:
Kleoniki: “Unë kam qenë në Gjipe, kam bërë kamping dhe ka qenë fantastike. Ka edhe 2-3 kuzhinierë aty, dhe nëse e menaxhon mirë, ushqimi për ditë të tëra mund të kushtojë jo më shumë se 30 mijë lekë. Nuk është çështje varfërie, por përjetimi.”
Loredana, nga ana tjetër, e cilësoi kampingun si lodhje më shumë sesa relaks, veçanërisht për një familje:
Loredana: “Ideja është që një familje, që punon gjithë vitin dhe më në fund gjen pak kohë për pushime, nuk mund të kthehet më e lodhur sesa ishte. Pushimi është çlodhje.”
Por Kleoniki këmbënguli:
“Ka njerëz aventurierë që kënaqen nga kampingu. Është mënyra më e thjeshtë dhe më e lirë për të qenë afër natyrës.”
Pikërisht në këtë moment, Gerta bëri komentin më të debatueshëm të mbrëmjes:
Gerta: “Tregon sa fakire je kur shkon në çadër. Pushimi duhet të jetë kënaqësi, jo hall.”
Komenti i saj ndezi reagime edhe nga publiku në rrjete sociale, ndërsa Rudina tentoi ta zbutë atmosferën duke e quajtur kampingun një “aventurë të bukur”.
Rudina: “Është super aventurë, Gerta. Jo të gjithë shkojnë me hall. Ka nga ata që kënaqen realisht.”
Por Gerta këmbënguli:
“Ti nuk po shkon për të pushuar. Ti po shkon se nuk ke tjetër mundësi.”
Debati nuk mbeti vetëm në studio – pasi klipet nga emisioni u përhapën me shpejtësi në rrjete sociale, ku ndjekësit ndanë mendimet e tyre në mënyrë të polarizuar. Disa u pajtuan me Gertën, duke e konsideruar kampingun si “opsion të detyruar për shkak të pamundësisë ekonomike”, ndërsa të tjerë mbrojtën të drejtën për pushime alternative, të lidhura me natyrën, pavarësisht kushteve financiare.
Diskutimi që nisi me statistika, përfundoi me një përplasje narrative mes klasave, mënyrave të jetesës dhe konceptit se çfarë janë pushimet e vërteta. Një gjë është e sigurt – tema e pushimeve verore në Shqipëri nuk është thjesht për motin dhe plazhin, por shpesh bëhet pasqyrë e statusit shoqëror dhe perceptimit për “jetën e mirë”.