Një studim paraprak i Universitetit Yale ka identifikuar një sërë simptomash që shfaqen pas marrjes së vaksinës kundër COVID-19 dhe që zgjasin për një periudhë të gjatë.
Pjesëmarrësit në këtë studim raportuan shumë lodhje, mpirje të gjymtyrëve, vështirësi në përqendrim, probleme me gjumin, ndjesi të rrahjeve të shpejta të zemrës dhe dhimbje muskujsh.
Përveç këtyre, studiuesit vunë re raste të rikthimit të virusit Epstein-Barr dhe nivele më të larta të proteinës spike, të cilat sipas tyre “kërkojnë hetime të mëtejshme për diagnozë dhe trajtim”.
Hulumtimi, i publikuar në medRxiv, u krye mbi një grup prej 42 personash që kishin raportuar simptoma pas vaksinimit dhe u krahasuan me një grup kontrolli prej 22 personash.
Analizat treguan ndryshime të dukshme në sistemin imunitar tek të parët, përfshirë ulje të disa llojeve të qelizave mbrojtëse dhe rritje të qelizave të tjera që lidhen me reagime inflamatore.
Në disa raste, te individët që nuk kishin kaluar COVID-in, u vërejtën nivele më të ulëta të antitrupave ndaj virusit, gjë që mund të lidhet edhe me numrin më të vogël të dozave të vaksinës. Një zbulim i veçantë ishte se tek disa persona u gjet proteina spike në gjak edhe më shumë se 700 ditë pas vaksinimit.
Sipas studiuesve, këto të dhëna nuk japin ende përgjigje përfundimtare, por hapin rrugë për kërkime të tjera mbi një fenomen që deri tani ka marrë pak vëmendje.
Ata theksojnë se vaksinimi mbetet mjeti më i rëndësishëm për të mbrojtur shëndetin publik, por studime të tilla janë të nevojshme për të kuptuar më mirë efektet afatgjata te disa individë.
Burimi: YaleNews – “Immune markers of post-vaccination syndrome indicate future research directions”
