Ministria e Arsimit ka miratuar Kodin e ri të etikës për mësuesit e sistemit parauniversitar, i cili përcakton standarde të reja që stafi arsimor duhet të zbatojë brenda dhe jashtë shkollës.
Në dokument theksohet se mësuesit duhet të jenë model integriteti dhe përgjegjshmërie, edhe në përdorimin e rrjeteve sociale. Postimet publike me foto apo video duhet të jenë në përputhje me etikën profesionale dhe të mos cënojnë imazhin edukativ.
Kujdes i veçantë kërkohet edhe për paraqitjen në mjediset e punës. Veshja duhet të jetë e rregullt, e pastër dhe profesionale, duke shmangur aksesorë apo stoli të mëdha e me ngjyra të forta që tërheqin vëmendjen ose krijojnë zhurmë.
Kodi përcakton gjithashtu që mësuesi duhet të respektojë privatësinë dhe dinjitetin e nxënësve, të shërbejë si model në komunikim dhe zgjidhje paqësore të konflikteve, si dhe të mbështesë kolegët e rinj në përvojën e tyre profesionale.
Me këto rregulla, Ministria synon të forcojë rolin e mësuesit si figurë shembull për nxënësit, jo vetëm në klasë, por edhe në jetën publike dhe online.
