Rimbursimi për prindërit me fëmijë nën 18 vjeç do të bëhet në periudhën 22 janar deri ne 31 mars. Për te përfituar, prindërit duhet të bëjnë deklaratën DIVA ne sistemin e Tatimeve.
Nga ky vit, deklarata DIVA nuk është detyrim ligjor, por një mundësi rimbursimi, veçanërisht për prindërit. Bazuar në ligjin e vitit 2023 për tatimin mbi të ardhurat, në një familje me fëmijë, do të bëhet zbritje nga baza e tatueshme.
Në sistemin e tatimeve, çdo prind që ka fëmijë nën moshën 18 vjeç, ka të drejtë të zbresë nga baza e tij e tatueshme 48,000 lekë në vit për çdo fëmijë. Ky rimbursim përfitohet për çdo nivel page përmes deklaratës DIVA në faqen online të Tatimeve.
Por ka edhe një përfitim të dytë, ku mund të zbriten edhe shpenzimet për shkollimin e fëmijëve në shkolla private deri në 100 mijë lekë në vit, me kusht që paga vjetore bruto të mos jetë më e madhe se 100 mijë lekë në muaj.
Tatimet sqarojnë se për të përfituar nga skema, në një çift bashkëshortësh, zbritjen duhet ta kërkojë prindi që ka të ardhurat më të larta.
Kjo maksimizon vlerën e rimbursimit. Për shpenzimet arsimore, duhet të keni ruajtur çdo faturë tatimore dhe mandat pagese të vitit 2025 dhe kontratat me shkollat. Ndërkohë, sistemi për dorëzimin e deklaratës DIVA do të aktivizohet nga data 22 janar deri më 31 mars të këtij viti.
