Një çift sipërmarrësish u grabit në vilën e tyre në zonën e Capalbio, në provincën e Grosseto në Itali, pasi katër persona të maskuar hynë gjatë natës në banesë dhe i kërcënuan me armë për të zbuluar vendndodhjen e një kasaforte.
Sipas raportimeve të mediave italiane, grabitja ndodhi të premten në mbrëmje në një vilë në zonën rurale të Maremma. Katër grabitës maskuar dhe të armatosur me pistoletë hynë në pronë nga kopshti dhe pritën kthimin e pronarit.
Rreth orës 22:30 në banesë mbërriti fillimisht bashkëshortja e sipërmarrësit, e cila u detyrua të hapte derën. Autorët e kërcënuan dhe i kërkuan të tregonte se ku ndodhej kasaforta, por në shtëpi nuk kishte një të tillë.
Rreth një orë më vonë mbërriti edhe bashkëshorti, 67 vjeç, i cili vuri re se diçka nuk shkonte nga dritaret e hapura të shtëpisë. Pak çaste më pas ai u përball me grabitësit, të cilët i drejtuan armën në kokë dhe i kërkuan sërish të tregonte vendndodhjen e kasafortës, duke menduar se ai sillte në shtëpi të ardhurat e ditës nga biznesi. Megjithatë, sipërmarrësi kishte shitur aktivitetin e tij dy vite më parë.
Në mungesë të parave të shumta, grabitësit morën rreth 400 euro cash që ndodheshin në shtëpi. Përveç kësaj, ata grabitën edhe unazën e martesës së nënës së gruas, e cila kishte ndërruar jetë vetëm 20 ditë më parë.
Pas largimit të autorëve, çifti njoftoi menjëherë autoritetet dhe sipërmarrësi bëri kallëzim në polici. Hetimet për identifikimin dhe kapjen e grabitësve kanë nisur nga karabinierët.
Comments are closed.