Në një analizë të gjerë mbi sistemin e sigurimeve shoqërore, i cili rregullohet nga Ligji 7703 dhe me ligje të tjera se janë rreth 74 lloj përfitimesh, eksperti Kujtim Hoxha ka detajuar hapat që duhet të ndjekin qytetarët për të mbrojtur të drejtat e tyre. Ai vuri në dukje se problemet janë komplekse dhe shpesh njerëzit nuk i kuptojnë tamam parashikimet ligjore, ndërsa administrata nuk është gjithmonë e gatshme të ofrojë zgjidhje.
Perspektiva e re për bonusin mujor në vitet 2027-2028
Një nga shqetësimet më të mëdha lidhet me “tavanin” prej 220,000 lekësh (të vjetra), i cili ka lënë jashtë bonusit (kompensimit) shumë pensionistë që marrin pensione të pjesshme pleqërie sipas VKM nr. 828. Megjithatë, eksperti theksoi se kjo situatë mund të ndryshojë në të ardhmen e afërt.
“Është kompetencë e saj (qeverisë) që në vitin që do të vijë mund ta korrigjojë dhe tani në vazhdim është kompetenca e saj për të shikuar dhe për të rregulluar ndonjë ndryshim të mundshëm për të kënaqur një pjesë më të gjerë të qytetarëve,” tha eksperti Kujtim Hoxha.
Ai sqaroi se ndryshimi i skemës është jetik, pasi pa të pensionet do të mbeten statike dhe nuk do të arrihet objektivi që mesatarja e pensionit të shkojë drejt 400 eurove. Këto bonuse, shtoi ai, janë të ardhura që mblidhen jashtë pensionit bazë dhe nuk i nënshtrohen indeksimit.
Transparenca ligjore
E drejta për përgjigje zyrtare me shkrim Zoti Hoxha bëri thirrje që çdo qytetar që ka dyshime për llogaritjen e pensionit të ushtrojë të drejtën e tij për informim zyrtar. “Administrata e sigurimeve shoqërore duhet t’i kthejë përgjigje me shkrim, sepse jo vetëm që po flasim që është shërbimi zyrtar është flasim korrespondent zyrtar e tjerë e tjerë patjetër por edhe për faktin që qytetari kur nuk mbetet i qartë nga shpjegimet ai mund të shkojë në gjykatë,” tha eksperti Kujtim Hoxha.
Ai kritikoi ashpër praktikat ku administrata refuzon të kthejë përgjigje zyrtare, duke u bërë pengesë që qytetari të ndjekë rrugën gjyqësore. Sipas tij, sqarimet nga ISSH janë të detyrueshme dhe duhet të jepen falas nga punonjësit kompetentë.
Lehtësimi i dokumentacionit për emigrantët
Për pensionistët që kërkojnë vërtetime për vitin 2025 për t’i përdorur jashtë vendit, eksperti sqaroi rrugën e thjeshtuar teknologjike përmes e-Albania. “Vula elektronike është vulë shtet,” tha eksperti Kujtim Hoxha, duke konfirmuar se ky dokument është plotësisht i vlefshëm.
Procedura kërkon që vërtetimi i gjeneruar të përkthehet, të noterizohet dhe të pajiset me vulën apostile në Ministrinë e Jashtme për t’u njohur nga shteti grek. Nëse kërkohet një vërtetim “negativ” (që personi nuk përfiton pension), ai duhet të kërkohet fizikisht pranë ISSH-së për të marrë një dokument me vulë të njomë.
Statusi i profesioneve të vështira
Eksperti solli në vëmendje se për kategoritë e vështira, si saldatorët e Azotikut në Fier, mbetet në fuqi VKM nr. 526 e vitit 1958, e cila i klasifikon ata në kategorinë e dytë të punës, duke u mundësuar daljen në pension që në moshën 55 vjeç.
Megjithatë, ai bëri një sqarim të rëndësishëm për sigurimin vullnetar: “qytetari kur plotëson moshën e ka mbyllur historinë e tij dhe nuk mund të blerë më periudha,” tha eksperti Kujtim Hoxha. Ai saktësoi se periudha 1991-1993 për ish-kooperativistët konsiderohet “vakante” dhe aktualisht nuk mund të blihet me sigurim vullnetar pasi mungon baza ligjore, edhe për ata që nuk e kanë mbushur ende moshën e pensionit.
Comments are closed.