Lajmi i fundit/ Mbyllet Ambasada Amerikane ne Kuvajt

Ambasada e Shteteve të Bashkuara në Kuvajt është mbyllur “deri në njoftim të dytë”, sipas një njoftimi të publikuar në llogarinë zyrtare në rrjetin X, ku përmenden “tensionet e vazhdueshme rajonale” si arsye e vendimit.

Në njoftim thuhet se janë anuluar të gjitha takimet konsullore, si ato të zakonshme ashtu edhe ato emergjente, duke paralajmëruar qytetarët amerikanë për situatën e pasigurt në rajon.

Një ditë më parë, Departamenti Amerikan i Shtetit u bëri thirrje amerikanëve që ndodhen në disa vende të Lindjes së Mesme, përfshirë Kuvajtin, të largohen menjëherë përmes fluturimeve komerciale për shkak të “rreziqeve serioze të sigurisë”.

Situata në Kuvajt është tensionuar edhe më tej pas raportimeve se tre avionë luftarakë amerikanë janë rrëzuar të hënën në një incident të dyshuar si “zjarr miqësor”. Detajet mbi rrethanat e rrëzimit mbeten ende të paqarta.

Mbyllja e ambasadës në Kuvajt vjen pas një tjetër incidenti gjatë natës, ku ambasada amerikane në Riad të Arabisë Saudite u sulmua me dy dronë, sipas raportimeve paraprake.

Tensionet në Lindjen e Mesme vijojnë të përshkallëzohen, ndërsa zhvillimet e fundit kanë ngritur shqetësime për sigurinë e objekteve diplomatike dhe personelit amerikan në rajon.